Read Chang Naga TETENTANBÜ 20 Bible Online

TETENTANBÜ 20 - Chang Naga bible

TETENTANBÜ 20

¹Ih yungbüei no ngoutiko ngüh juongtida; aoyou khübüei leilangda songsido akibü.

²Choba che khauang lotbü kho molosaonyu ngühjinei no hatbü mokbü tegü kilabü; hao khau lottibü kho jembü lolo haingaibü jam.

³Oyolemen ka bangan kilabü kho nyensang nyenhang; lausikei ngoubü cheei oyolemen ong khangtida.

⁴Sekmoubü müt che aoei hauloko jih tetbüa youshou ashapda haoei latla akida.

⁵Müt cheeibü dambü kho deikhün haübü phatkei; lausikei ditenshuokenbüei khübü khuenda.

⁶Müt juongei jembü maibü shanga ong laueida; lausikei maanglemenbü mütei hao kho aoje lapenla haujemda.

⁷Saopobü mütei shedbü akibü langkei to leida; hao phaito sembü shousi shuongei haüa.

⁸Matjemshanga setbou Chobaei haoeibü nyekei amaibü pendou lamenda.

⁹Müt cheei tükde haoeibü maangpon hinseitham phoakei, hoba shabü ka saüena dogo laula thükasao?

¹⁰BUNYUBOUei ngühmaang alanbü ngongkam si jutak jungeibü mütshuong mangsenda.

¹¹Nashou chekei haoeibü kümeileiei hao ailaibü müt yingkeije hoba hao kho müt maibü si ji, kho lenla thükkei.

¹²BUNYUBOUei sen la haplabü nyek hoba ditlabü nou kuakei.

¹³Yepbüa kaibü jihsiphai apalonga no shalelabü; akong akangko kümaleiashi hoba nyi apsileko shaula haplabü.

¹⁴Jekbouei hanghangko nam- yak sekbü shangabü nyamnyamda; lausikei chem to ngaian phaiaje haoei namyak shangan ngaitian jekbü shanga yonglamda.

¹⁵Nyi ai joyolauyoda kho nyi ngean kialonga, hon si chandinam tokei aeibü nyi ki.

¹⁶Jim akibü mütei yenboueibü sanghsiyung shemla haoeibü nyaksinam kula thebülanbü leda.

¹⁷Ngühmaang alanbü ka sungbabü shausiyung kho nyi maanga maiko shaula thükkei; lausikei ho lounyu akiko langminei shenbü sembung che tegü kilabü.

¹⁸Songlen maibü sungletashi hoba nyi thüksimin haplabü. Kümthen che akiko lason to labou to shuokyola tohau.

¹⁹Huphang ngüh kho ladang kei küplepan phola athük; ngüh juongbü mütshuong ka kukan kishi.

²⁰Nyi kaibü nyusibou to khükauoka longa kaibü langkei kho nakthüh phanga hantin nyetbü tegü thonlabü.

²¹Nyi khangla sosotham pailetbü phetphan kho thonlaje ühaülabü.

²²Müt cheei shedtisi nyi jembü lolo kho teshemngai; BUNYUBOU to maanglem phoashi hoba haoei janbü kümlabü.

²³Maangalanbü seret si ngongkam BUNYUBOUei mangsenda.

²⁴BUNYUBOUei seneibü younak ngeakei, kholonga lai küman müt cheei jembü langkei lam ditenla thükkei?

²⁵Mühghaü la lembü kula athelettoua maangsangko daman chühashi; thebülanbü lean phaia laueia longa hao shanga onat yinglabü.

²⁶Songnge donge Chobaei aoei shedbü kümda kho lamenlabü, hoba sanou akakko hao shieikoelabü.

²⁷Müteibü soushou kho BUNYUBOUeibü hantin; hoei haoeibü maangkaboutham lamda.

²⁸Choba cheei ngühmai, tang bü janbüa song dakshongko haoeibü seisihau khei ong kilabü.

²⁹Heshou shuong hauki yaangkibü kho haoeneibü soneikangbü, hoba baushi shuong khuthubü kho haoeneibü soumo.

³⁰Ngümbü mou khoei shedbü saüenkuda, hoba ngümbüei maanga hekde yingda.