Read Chang Naga TETENTANBÜ 21 Bible Online

TETENTANBÜ 21 - Chang Naga bible

TETENTANBÜ 21

¹BUNYUBOUei Choba cheeibü maangpona dambü kho shushou dei leiyeibü hima sosotham leiyeida.

²Mütei kümbü ajanjan pendou kho haoei tükde tegü damla thükkei; lausikei BUNYUBOUei kaibü nongeisae pendou matjemda dogo damenashi.

³Hao la lembüsabü sungbabü toje tangbü janbü kümbü kho BUNYUBOU junga sungletenlabü ki.

⁴Yonglambü nyek si lilibü maangpon hoba amaiboueibü hantin kho shabü ki.

⁵Maangsangko kümthen küm- ashi hoba nyi apsileko kilabü; nyi panteiko kümbüei shale thu to leida.

⁶Ngühmaang alanbüei hapbü nyaksinam kho tongaitaiko paibü hak; aoyouei khübü lamda haoenei haibü lamda.

⁷Müt amaibü haoen jembü sekbülakbü thu thüngei sungbada; haoenei tükdebü kümla maang üangda.

⁸Shedbü mütshuongei nongbüsaibü lama paida; lausikei saopobü mütshuongei tangbü kümda.

⁹Khauang maangpokbü yaksa che yoa ongayasebü chem chenei kibü khantoje kepunga kibü maibou.

¹⁰Amaibü mütshuongei pon- pendou shabü to maangdakda; haoeibü lepbouei hao ka onou ühüpda.

¹¹Müt at haoeibü khüpsilang shanga shieinangei hapjinei maanglanbü müt cheei songsido hapda, hoba songsido kibou la songlenjinei haoei ditletbü songsido pailetda.

¹²Mühghaü saopobüei müt amaibü chemdanga ai loushetda kho chühletnyu phoda, hoba haoei müt amaibou kho mauthua phokuda.

¹³Shalebouei ngekbü to aditku longa nyi ngekbükei aditkulabü.

¹⁴Müt at ka to maangpoksi huphanga jongsak kualonga hao maang thonlabü.

¹⁵Ladang ngühmaia mat jemda, müt maibü shuong olinda; lausikei shabü shuong mauan apda.

¹⁶Ditenbü maibü ka kukan shoongaibü müt kho hao haibü shuong yoa thünglabü.

¹⁷Phe dühbü, olin kungkhenbü, ih hoba haabüteibü shauei yungei no ladangkei akeilabü.

¹⁸Saopobü shuong shabü shuong shanga angbou la yeida, hoba tangbou jeila yepeijawebou yukda.

¹⁹Khauang maangpok ngühlok angbü yaksa che yoa kibü khantoje phetsen kaodak to satan kibü maibou.

²⁰Songbüdobü chema namsek nyaksinam si onang kia; lausikei jim akibü mütshuongei suian apda.

²¹Aoei saopobü hoba sanou dambü phai semda, langkeia naangmaibü hoba hangenbü hapda.

²²Khübükhaubü leiyeibü cheei sekbülakbü mütshuongei aüetnangetan kibü sangnyu si banyu kümthang tuongtian apda.

²³Aoyouei jembü sembung lishang senetlaje haoeibü langkei thushed ka senetda.

²⁴Lilibü si yonglambü müt, haoeibü nyen ngühlok angbou; haoei yonglam lilikhua kümda.

²⁵Haulobü mütei haibü sungbada, aishanga haoeibü ikei kümmang leimang asühda.

²⁶Chaseko haoei dühda, lausikei saopobü shuongei kuda hoba senetan aphoda.

²⁷BUNYUBOUei shabü mütshuongeibü lembüsabü mangsenda; tokei haoeneibü shabü seneimaangei kusi sema lai aei yingla?

²⁸Amlangbü aukabü maulabü, lausikei aoei ngüha lelaje haoei laubü ngüh ponpen kilabü.

²⁹Saopobü mütshuong haoen lolo chongchingetnyu kida; lausikei müt amaibü shuong haoenei thükpangteiko maibouthamei the lenenla haujemda.

³⁰Müteibü songsihon, haiyep akbü ditenshuokenbü, khübü pendoua BUNYUBOU kakhu limbo kialonga ku aki.

³¹Nyi lason shanga koli lamlela thükkei, lausikei thüksimin kho BUNYUBOUei kuda.