Read Chang Naga TETENTANBÜ 22 Bible Online

TETENTANBÜ 22 - Chang Naga bible

TETENTANBÜ 22

¹Keito yaangtoje nyenmai ong pienjan; hon si chandinam toje onou maibou.

²Keibü si shalebü liko haüyoda; ham kho BUNYUBOUei kümbei

³Tedtangbü mütei khonsak thushed loubü hapda, hoba hao huda; lausikei soungouabüei takü paida hoba thonla khon kuda.

⁴Eaaoabü si BUNYUBOU to soumo hatbü jongsak kho keisiyaang, nyenhang, hoba salang.

⁵Khüpbülangbü lamnyua jakham si sung kia; lausikei aoei jembü soushou kapjinda hao khübü ka lounyu bangan kida.

⁶Nashou che kho hao haulabü lamnyua lenenashi, hoba hao chingsi khoka akuklabü.

⁷Shalebou kho keiboueibü sambü, hoba namlotbou kho lotkuboueibü sambü ki.

⁸Nyi ngühmaang alanbü wena longaje thushed latlabü hoba hao khauang maangpok ju kho jim akibü la yeilabü.

⁹Kaibü shausiyung shalebü to maanglansele janyoashi, hoba ho shanga no haükulabü.

¹⁰Mü awealaubou kho nangan sattiashi, hoba kho phaia pheyo phanyobü si ngühthang ayenko nyen phongko oyophetyobou kho nanglabü.

¹¹Nyi maangpon hinseibü hoba üeisanou ngüh mangsüha longa Choba kho ka thangbou yinglabü.

¹²Hapbü ngebü songsido kibü thüka BUNYUBOUei lomda; lausikei khüpbülangbü ngüh haoei apbuda.

¹³Haulobou mütei chema setan hao tangto anga tegüje molosaonyu kho haoei minoukhoulabü dogo lauda.

¹⁴Asangalan sao sembung kho püngkhün haübü, ao to BUNYUBOU khauangbü lotda hao khüto atetlabü.

¹⁵Nashou cheeibü maangpona ngoualouabü thonan ki, lausikei thepetbü juei hao ka lounyu bangtida.

¹⁶No kilakeila keibü la jongsak kualonga, ayingsi shalebü akainyu la lealonga, no jembü lolo shalelabü.

¹⁷Maang kuashi hoba songbüdobü ngüh to nou haangashi; ngei lenbü to ka maangponei maanga nepbo kiashi.

¹⁸Hobaje nyi amaako khübü kho ngühtet leko jungeia longa khoei no maanga mailabü.

¹⁹Ngei ka la BUNYUBOU to maanglem photimang sühda; hoba khoei ngei khübü kho tou ka la lenda.

²⁰Ngei ka shanga ngühlen khujin dokuakei. Khonei hapbü ngebü hoba songlen maibü yoakei,

²¹hoba ai ngühmai tükdebü ki kho lenlabü. Ladang no kho lamnyua hauda, kheijinei nyi tükdebü jongaibü kho haplabü.

²²Khei nyi thüksi minsikei shalebü thüka thük tele; hoba matjemshanga athük aminsapbo loan kibü thüka thük tele.

²³BUNYUBOU haoeneibü matjemshanga lokulabü hoba haoen to aoei hatlenlaje khübü shuong to hatlenlabü.

²⁴Maangsak yembü mütshuong to thangbou telam, hoba oyolemen müt to teyang.

²⁵Ai ngenyu nyi haoeneibü songsido ditletlabü hoba jaksheila athüklabü.

²⁶Müt ateibü sanghsiyung shanga onat künkula tethelet.

²⁷Nyi kho ashembuen longa haoenei kaibü shen to liko sungkulabü.

²⁸Kaneibü pisibouei kebü shangiedbü leilang ladangkei lühan tüp.

²⁹Kü la kümaleia hautaknepbü che lenbü, hoba ngei ka la Choba shuong yoa pendou to mubou hoba maiboutham lenlabü.