Read Chang Naga TETENTANBÜ 24 Bible Online

TETENTANBÜ 24 - Chang Naga bible

TETENTANBÜ 24

¹Amaibü mütshuong tedüh; hoba haoen to thangbou lamla hau tejem.

²Haoenei hanghangko dambü khümboei khonsak longtilabü shanga ong ki; jih weko haoeneibü sembung ipbü kho müt at leilutila ong ipda.

³Songeihonei chem che dangda, hoba ditenbüei kho kümsemda.

⁴Lanei hapbü ngebü ki khonei shemjang kho hemaibü namsek peisileiei shentida.

⁵Sekokbü müt toje songsido kibü müt maibou; haü, hau kibou toje hapbü ngebü aei kongnyubou.

⁶Khübü pendou phoan, no lasona mo alojinei nyi maangsangko kümthen kümjan, hoba nyi songlen maibü aei hapbü ngebü thüng, nyi wapyo aei thüklabü.

⁷Songnge dongeei lenla ngoubü müt che shanga ditenla yongko haükei. Kongnyu ngühsidei sangkujinei haoei laula akida.

⁸Nyi hanghangko amaibü kümla huongalonga, nyi lusaktibü nyenshed hapngailabü.

⁹Ngoubü huonsiyou takbü kho shabü. Aingenyu müla nyikubü müt che kho mütshuongei mangsenda.

¹⁰No thusheda nyibutham apalonga kaibü hau hana.

¹¹Hailabü lele kibü müt che khümenla tesuktedem.

¹²Nyi “Ngei ho angekei” dogo telau; lausikei Mühghaüei kaibü nongeisae ngean mat jemda. Haoei no lomda, haoei ngeda. Hobaje nyi kümbü thüng haoei ka la jongsak kulabü.

¹³Kü shou, nyi naodei shauashi, ho maiakei, hoba hap ka sungbüyam kho teishiktham ki.

¹⁴Kho tegü ka soushou shanga songsihon kho maiakei dogo chongchinglabü. Songsihon ha- pashi hoba kaibü leilubü thu kho ngesakle kilabü.

¹⁵Saopobü müt cheeibü chem sola soshau soyungbü müt amaibou tegü teying.

¹⁶Ai aying, maang tangbü mütje laiche küman annebenko tuongasikei longaida; lausikei müt amaibü thushedei mautida.

¹⁷Kaibü dangbou thushed kühshuokjinei hoba hao phaiyetan tuongjinei no teolin.

¹⁸No yonglambü kho BUNYUBOUei ngelabü, hoba haoei no amangsühlabü; hoba haoei haoen ashiakoelakei thükkei.

¹⁹Shabü müt shuongei no maang temauti, nyi haoen tedüh.

²⁰Müt amaibü cheei loulabü thu shanga aikei chüheilabü aki.

²¹Kü shou, nyi BUNYUBOU to soumo hatashi hoba Choba kho hangenashi; haoen khulimbü mütshuongei kümlabü ai aki.

²²Khübü mütshuong nyek shemjang alaptoua leiluan apla thükkei. Mühghaüei ayingsi Chobaei ka la thushed kulabü kho damendalao?

²³Songbüdobü mütshuongei habü hokei lauakei. Matjembou cheei the chühbü kho shedbü.

²⁴Aoyouei müt amaibü shedtibou to “No shedbü aki” dogo laulaje hao khükei uokeilabü hoba mangsenlabü.

²⁵Matjembou shuong aoyouei shedbou la kayang kuda, haoei haülabü haplabü hoba nyenmaia olinda.

²⁶Tangshaitham lanko jongaibü kho tükdebü thangbou tetsida lenbü ki.

²⁷Kaibü sek akhüm shongko nyi kaibü chem dangla telamle, hoba kho phaia ong kaibü shiang lamenlabü.

²⁸Amlangbüa müt at khulimbo aukhen aolep tüt, hoba tekhüp telang.

²⁹“Haoei kü to kümbü tegütham ngei hao to kümngailabü! Haoei kümbü thüng ngei shemngailabü” dogo telau.

³⁰Ngei haulo haushedboueibü sek si haang alongboueibü semlühlaak nakjung dankei.

³¹Khübü kho jakham si senouei chinglepnyu kikei, hoba kaijembo laang ba khokei tuongan kikei.

³²Kheijinei ngei khüto chühkei, hoba ho daman chühkei, hoba ho ka ditenbü che hapbei.

³³No yepmang sühsije che ngakashi. Kaibü ik shenyoan longche haksoashi;

³⁴lausikei no longche yeptoua shaleei insiaubu jungbü soshau soyungbü müt cheei tegü no laphetlabü.