Read Chang Naga TETENTANBÜ 25 Bible Online

TETENTANBÜ 25 - Chang Naga bible

TETENTANBÜ 25

¹Habü hokei Jihuda Choba Hezekia mütshuongei doletbü Solomoneibü tetentanbü ki.

²Mühghaüei ai huan phokukei kho shanga senei hao soneikangtida; Choba shuongei ai wanan lenda kho shanga senei haoen la nyensang kuda.

³Nyi Chobaei dambü ladangkei angeda; mühshuong suokbü ayingsi yungnyu haübü tegü haoeibü dambüei sen limakei.

⁴Chandinam ka namphet kho apashi, hoba yaübü shuongei maisho yaüenlabü.

⁵Hibü songlen amaibü kubü mütshuong Choba jungka kuktiashi hoba khei yingsi ong haoeibü saopobü songdak kho ngelabü.

⁶No Choba thedanga lojinei hao tethung tejangei hoba no konglebou tegü telen.

⁷“Kaibü setshang mü lubü kongnyubou la kuashi” dogo laubü toje “No thükkabou setshang to kayang” dogo laubü maibou.

⁸Kaibü nyekei hapbü kho matjemshang to yongko panteiko jungan tohau; phaito lubüei kaibü shedbü lapsi kheijinei nyi ai kümla?

⁹Kaibü lepbü sangmang yoa aditenbü kisi kasi kanglanga ditenyoashi, hoba müeibü hup- hang tekhuok.

¹⁰Khei ayinglonga müei ka nyen shalabü hoba kaibü himou ladangkei asatlabü.

¹¹Dambü maibü wanan lenbü kho chandinama honlaang shanjinbü phatkei.

¹²Ditla maangdakbü to songsido kibü mütei hakbü honeibü ikjikhap ayingsi hinseibü honeibü chimenyakmin to kei khaibou.

¹³Youlatjih sanglema deili tegü, maanglemlabü ngühlang künbou kho hao hautibou senyüh shemtibou kho ki.

¹⁴Mütshuong aoyouei haoenei ladangkei akunyu thekuda, khübü kho lang athonbü sangmei si yei phatkei.

¹⁵Lounyu natenbü hoba subüjabüei kaangkosekko thangetbü leilutida, hoba songdakbü shuongkei leibada.

¹⁶Nyi ladangkei naodei aei teshau, lemaia shaushi; dantisi nyi ngaitibula.

¹⁷Ka lepbou chem annebenko pean techüh; hao ka to olabü hoba mangsenan aplabü.

¹⁸Aukhen aolepbü müt che kho haitibü inlou, bungüm ayingsi laujin simbü che phatkei.

¹⁹Khonsak thusheda maang alemenlabü müt to nongbü kho hauh amaibüei nyaila athükbü ayingsi sokebü yoa paila haujembü phatkei.

²⁰Maangngangbü müt che la chia atkubü kho khamalüha nei khokan apbubü ayingsi haijepbüei mou sakkubü phatkei.

²¹Kaibü dangbou mühei haiko kialonga hao la oknyinashi; hoba hao dei laalonga hao la dei inashi.

²²Nyi hao himoutibüei wankak yasebüei tegü lamlabü hoba BUNYUBOUei ka la jongsak kulabü.

²³Yungkük yeiei lang sungbabü tegü, ngüh jungeibü lishangei maangshat sungbada.

²⁴Khauang maangpok yak che yoa chem chenei kibü khantoje kepunga kibü maibou.

²⁵Thonla loubü saabü kabü ngühlang kho no deilaei maang laakjinei deili phatkei.

²⁶Thimkükdei ayingsi yungdei ngatbü phatko, saopobü mütei shabü shuong ngüha hehoat kibü kho ki.

²⁷Naodei juong shaula amaibü tegü, mü yongko sangbükei khei yingkei.

²⁸Nyi kaibü khauang thepetla athüklonga, no kho müei shila sobü ba alebü sangnyu che phatko ki.