Read Chang Naga TETENTANBÜ 26 Bible Online

TETENTANBÜ 26 - Chang Naga bible

TETENTANBÜ 26

¹Ngoubü shanga sangbü- yaübü kho, sanglem jiha ninthu lenbü hoba khamalüha lang loubü phatkei.

²Ajan ayingbüa khükbü uokbüei ka la ai ayinglabü; haoen kho pakshang akiko seengeibü aushuong phatkei.

³Nyi koli to semjan, gadu janglühei thepetjan, hoba ngoubü to lijuei ngümjan.

⁴Ngoubü to hao ngoubü thüng tejongai, khei kümalonga nokei hao tegü yinglabü.

⁵Ngoubü che to hao ngoubü thüng jongaiashi, khei yingalonga haoei hao lolo sangbü tegü damlabü.

⁶Ngoubü che la ngühlang küntibü kho nyi jembü you wetan apbü ayingsi lusakbü yungbü phatkei.

⁷Ngoubü sembunga tetentanbü kho sokemokebü phatkei.

⁸Ngouei huongbü müt la nyensang kubü kho lüklük kipjina laang jinbü phatkei.

⁹Ngoubüei tetentanbü jungeibü kho ihjaakbü mütei haoeibü ika ngütbü jak apla haujembü phatkei.

¹⁰Eiklambü aoei ngoubü si danbüphaibü mangthem ong eik lamda, khübüei müt pendou la nali thetida.

¹¹Keiei jembüei khinngaibü to sepeinyu ngaibü tegü, ngoubüei nyibou ngoualouabü kümsilei kümda.

¹²Aoei ai angenyu hao sangbüdobü tegü damda, khotoje yongko ngoubüeibü maanglem kho khaibou.

¹³Haulo haushedbü müt aila chem ka alongda? Hao aito hatda? Molosaonyu sai?

¹⁴Koukap kepjaa yikaibü tegütham, haulo haushedbouei jembü shena lükaida.

¹⁵Müt atje jembü sembung to nyak mokan attila to liko haulobü kia.

¹⁶Haulobüei müt nyetei dambü maibü kubü toje hao ong aei songsido kibou dogo damlabü.

¹⁷Aoei mü oyophetyoa sembung atda, hao kho khongshongbü keieibü noua yaübü phatkei.

¹⁸Aoei mü khüpettida hoba kho “Amlang ekyoda” dogo lauda, kho langet angbü mütei wanted, laujin ayingsi hailabü insiaubu tekan jinkubü phatkei.

²⁰Bu akilonga wan nyetda; kokngüh shakyojepyo akilonga oyophetyo thonda.

²¹Wankak yasebüa wan lapda; kho tegü lemen longtibouei pheyo phanyoko ong kida.

²²Kok shakyobü kho jemoubü shausiyung phatkei; khübü kho shiangmaang to atda.

²³Ngüh haabü sembung si shabü maangpon namdei lakbü thamchak phatkei.

²⁴Hibüyoubü mütei haoei mü mangsenbü kho hao khüpbülangbü ngüha huan phoda.

²⁵Khübü kho maian hapla thükkei, lausikei hao to maitelem; aieilausi haoeibü maangpon mangsenbüei shenakei.

²⁶Haoei mangsenbü kho maian lensikei, müei haoei amaibü kümbü pendou haplabü.

²⁷Aoei mü la tin sankuda jembü lolo minngaida. Aoei laang khokeida kho hao thükto tongjung loukoulabü.

²⁸Yepei jawebü mütei müt at leilutimang sühbü kho nyi mangsenjan. Suthetbouei ai ühüpshauda, lausikei leilubü ong longtida.