Read Chang Naga TETENTANBÜ 27 Bible Online

TETENTANBÜ 27 - Chang Naga bible

TETENTANBÜ 27

¹Ngiet shangabü yong telam, tou anjih kanglanga ai yinglaje angekei.

²Nyi no lolo ka sembungei ayingko khei mü tangkabü la sangtiashi.

³Ngoukolouko khonsak longtibü kho laang si phetsen atshaibü ham khüto takyolabü aying.

⁴Khau lotbü kho onou akakbü, maangpok angbü kho yungsen; lausikei nyek to shatbü thedanga ao loenla?

⁵Huphanga sanoubü toje thedanga hakbü maibou.

⁶Thangbouei aktibü kho maanglem kia; lausikei dangbouei ka to phak himbü kho maangsanglabü kia.

⁷No ladang shi shenan kilaje nyi naodei amühlabü; lausikei no ladang mühei hailaje khaubü shausiyungkei teiko shauenlabü.

⁸Müt che chem ka satan shoongaibü kho au che haoeibü hap ka satan shoongaibü phatkei.

⁹Onang si ponlemei maangpon olintida; lausikei soushou je khonkuei laü angda.

¹⁰Ka thangbou shuong ayingsi kaboueibü thangbou shuong tema. No khonsakjinei kajaikana thuila tenga; saabüa kibü jaimai namai to je nyangko kibü lepbou che kho khaibou.

¹¹Kü shou, sangadoashi, ngo olinlabü; kheijinei ngei ngo awealaubou to jongaila kilabü.

¹²Tedtangbü mütei thushed loubü kho hapda hoba kho ka huda; lausikei songlanbouei khei ong hauda hoba hao jembü lolo khonsakda.

¹³Ngoualoua yenbou shanga sanghshemla theletbü leboueibü neisimei kho letiashi, hoba usa kabü yaksa shanga sanghshemla theletbü lebou kho theletshang to attiashi.

¹⁴Ngeyang enyu pian aoei ngekko hao thangbou haükuda, hao shanga kho khüksiuok dogo weeida.

¹⁵Nyamsa nyu che kho lang loujinei det det sangbü langdei phatkei.

¹⁶Nyi sao semeshoko phola thükasao? Nyi yei thangetan chühlao? ayingsi ikmaang shenko naodei jungan chühlao?

¹⁷Namei nam uan phamtida, kho tegü müt cheei müt che uan phamtida.

¹⁸Aoei bhuklong che thounouda, haoei khoeibü hek shauda; hoba aoei jembü BUNYUBOU weeida, hangenlabü.

¹⁹Nyi deia kaibü thenyek hapngaibü tegü nyi kaibü maang- pona no khoyam hapda.

²⁰Sheol si Abaddon ladangkei senyüh ashemda; hoba müteibü nyekkei ladangkei ashenda.

²¹Sinletbü kho chandinam shanga, hoba wansoujin kho hon shanga; hoba müt che hao sangbüei takteida.

²²Shaubü anbü yoa shema muei ngoubou kho netla yeiko shinyinashi; khoeikei nyi hao ngoualouabü kho üpbuenlabü.

²³Kaibü sanshuong si masu shuong to maangsangko chühashi,

²⁴aieilausi nyaksinam pon- pen shanga aying hoba Choba khun kho meten pendou shanga lo aying.

²⁵Ladang ushisang shemda, nyemshang haanbü kho longda, hoba shonghyou pik shuong lipshaida.

²⁶Nyi kaibü sanlon shuongeibü wiei nei taklabü hoba lon yaakletbü ka sek jeklabü.

²⁷Hobaje joubü lon shuong khoei kaibü chemdang samla sendei souko kulabü hoba kho tegü kaibü sambüsao shuong pangteilabü.