Read Chang Naga TETENTANBÜ 28 Bible Online

TETENTANBÜ 28 - Chang Naga bible

TETENTANBÜ 28

¹Aoeikei ashieinyu müt amaibü shuong sateida; lausikei saopobü müt molosaonyu tegü maangkaangko kida.

²Ladang phang cheei shabü shonda, hoei songdakbü juong yeida; lausikei ditenbü si songsido kibüei phang che kho hau kiko süngshonko kitilabü.

³Hau jungeibü müt che, aoei shalebü shieikoedaje, hao kho langle apbubou deinyu yungsen phatkei.

⁴Ngühkhüm inletbou khoei shabü shuong sangda; lausikei ngühkhüm jungeibü shuongei haoen khulimbo loda.

⁵Amaibü mütshuongei ngühmai kho aditenda; lausikei aoyouei BUNYUBOU lamda, haoenei kho maisho ditenda.

⁶Keisikei khüpeilangeibü müt toje shalesikei ngühmaang lanko kibü maibou.

⁷Aoei ngühkhüm jungeida, hao songsido kibü shou; lausikei shaumüt yungmüt to jambüei jembü bou himou bautida.

⁸Aoei namlot si phobnamei jembü nyaksinam haatida, shalebü shuong to sanouko dambubou shanga kho thanshaida.

⁹Aoei ngühkhüm ajungeilaje haoeibü welaukei aditkulabü.

¹⁰Aoei maangtangbü müt ayingbü lam to leian jinda, hao jembü püngkhün to atlabü; lausikei shedbü akibü mütei phet maibü phanlabü.

¹¹Keibüei hao lolo songsido kibou dogo damda; lausikei shalebou ao to ditenshuokenbü thechüh ki, haoei maibou ngekei.

¹²Saopobü shuongei thüksimin hapjinei müt pendou olinyoda; lausikei müt amaibü songdak hau to angjinei mütshuong huan apbuda.

¹³Nyi kaibü shabü hualonga langkeia no ladangkei naang amailabü; thekuashi hoba apyoashi, kheijinei Mühghaüei ka to onou lenlabü.

¹⁴Aoei BUNYUBOU to soumo hatda, haoei haükei; lausikei tuasekalonga thushed to atlabü.

¹⁵Amaibü songdakbou kho shalebü shanga lejim aki; hao kho ngühbü molosaonyu ayingsi huokbü sap phatkei.

¹⁶Ditenbüa shalebü songdakbou kho tokei shieikoe yaang kia; lausikei aoei aeilam aeiphop mangsenlaje hao salanglabü.

¹⁷Müt haitibü shedbü kümbü mütei haoei thükbü tegü panteiko haoeibü heekhün thuda; hao shieila hau tejem.

¹⁸Ngühmaang lanashi hoba no püetlabü; no ngühmaang alanlonga no mangde atetlabü.

¹⁹Haujembo kümbüleibü sekmoubouei shaula kida; lausikei aoei jihsiphai apsileda hao pon- pen sha lelabü.

²⁰Ngühmaang lanbü ongayasebü olinbü langkei to leilabü; lausikei no keila panteialonga no shieikoelabü haang.

²¹Maangthük maangphang kümbü kho amai; lausikei mütei shausiyung hanbüshou shanga ngühkhüm lulimda.

²²Makhet meletbü mütshuongei haoen ladang shale phamla angeko keila panteida.

²³Lepbolangko laubü toje müt at kümetkubü maibou, phaila haoei khoto maangshiklabü.

²⁴Aoei nyusiboueibü nyaksinam kokan sungan ho shedbü aying dogo damda, kho kokbü to maibou aying; hao leiluboueibü meitangbou.

²⁵Kükükanong dambüei ong oyolemen longtida; lausikei aoei BUNYUBOU to maanglem phoda hao ong maibou.

²⁶Jembüei dambüa ong paibü kho ngoubü; lausikei ao songsido kiko pailaje hao khümenlabü.

²⁷Shalebü la kubou kho ladangkei sha alelabü; lausikei nyi shalebou ka the huan kialonga mütshuong ka khüksiuok yaang haplabü.

²⁸Müt amaibü songdak hau to angjinei mütshuong huan apda; lausikei haoen maujinei saopobü shuong nyibou haada.