Read Chang Naga TETENTANBÜ 29 Bible Online

TETENTANBÜ 29 - Chang Naga bible

TETENTANBÜ 29

¹Annebenko kümetkusi aoei tulaseklaje hao mangde ong maulabü, hoba ladangkei asinngailabü.

²Saopobü shuong haajinei noknyüh olinyoda; lausikei shabü mütei songdakjinei noknyüh sangwi jangda.

³Aoei songsido maikuda haoei bou olintida; lausikei aoei asangalan sao shuong to mangjamda haoei jembü nyaksinam apsileda.

⁴Chobaei ngühmaiei kaodak yaüda; lausikei aoei jongsak hida haoei kho pekan apda.

⁵Aoei jembü lepbou amlanga sangda, haoei jembü younaka tak sanda.

⁶Amaibü müt kho ngühkhüm lelimbüa lapda; lausikei saopobü mütshuongei chia lauko olinyoda.

⁷Saopobü shuongei shalebü shuongeibü khonsak ngeda; lausikei amaibü mütshuongei khübü kho ditenla athükda.

⁸Mü awealaubü mütshuongei sangnyu che jikan apbuda; lausikei songsido kibü mütei khübü kho küpjemtida.

⁹Ladang sangbüdobü mütei ngoubü to mat angda, ngoubü kho nyi ong nyida, hoba khau angan ngekko küpjembü to alouda.

¹⁰Sii mühbü mütshuongei maangtangbü shuong mangsenda, hoba maangtangbou kho haitila lamda.

¹¹Ngouei huongbü mütshuongei jembü khauang pendou khokenda; lausikei tedtangbü mütshuongei natenko senetda.

¹²Songdakbou cheei amlangbü ngühlang to maang kualonga, hao phanga kibü songdakbü shuong pendou yepeijawebü la yeilabü.

¹³Shalebou si naklepbou haosi ham liko haüyoda, BUNYUBOUei haosi ham la ngesakbü kuda.

¹⁴Chobaei shalebou la tükdebüa yingkua longa, haoeibü songdak hangkhu onko kilabü.

¹⁵Kümetkubü si thepetbü ham khoei hapbü ngebü kuda; lausikei nashou che kho hao maang leko phokua longa haoei haonyu himou bautida.

¹⁶Shabü shuong songdak phanga ngühkhüm lulimbü juong yeida; lausikei saopobü mütshuongei kho tegübü mütshuong atbü haplabü.

¹⁷Ka shou thepetashi, hoba no hao shangabü ponpendou the lenenlabü; haü, haoei ka maang- pona olinbü kulabü.

¹⁸Lanei thuseibü songlen aki, noknyüh senetbü aki; lausikei aoei ngühkhüm jungeida, hao haübou.

¹⁹Sambü che ngüh kongeije akümetkuenda, haoei nyi laubü kho ditenla thükkei, lausikei haoei kaibü ngüha maang akulabü.

²⁰Nyi ngüha panteibü müt che haplao? Hao toje ngoubü cheeibü maanglem khaibou.

²¹Nyi kaibü sambü la nashoudangka thama haoei mangsühbü pendou kualonga nyetcheje haoei kaibü phet pendou phanlanglabü.

²²Khauangla sobü mütshuongei oyolemen longtida, hoba maangsak yembüei shedbü juong shonda.

²³Liliseseei no phangto yanlabü; lausikei no ea aoa kialonga nyi nyensang nyenhang haplabü.

²⁴Aoei kokbü to maangjamda, haoei jembü langkei mangsenda; haoei khükbüuokbü kho ditda lausikei aikei ajoyoda.

²⁵Müt to hatbüei jembü lolo sung sanngaida; lausikei nyi BUNYUBOU to maanglem phoa longa no khümenlabü.

²⁶Müt juongei songdakbüei maangshikbü maikuda; lausikei BUNYUBOU ka ong kaibü matjem tükdebü kho haplabü.

²⁷Saopobü shuongei ngühmaang alanbü mangsenda; lausikei maangtangbü kho shabü shuong thedanga mangsenlabü.