Read Chang Naga TETENTANBÜ 3 Bible Online

TETENTANBÜ 3 - Chang Naga bible

TETENTANBÜ 3

¹Kü shou, ngeibü songlen tema, lausi ngeibü ngühkhüm shuong ka maangpona phoashi.

²Ngeibü songlenei no salangko haangkhu ontilabü hoba no naangmailabü.

³Sanoubü si maanglemenbüei no tüpyotima; khübü kho kaibü ngüma yakashi; khübü kho kaibü maangpona doan phoashi.

⁴Nyi khübü kümalonga Mühghaü si müt hamei ka to olinlabü.

⁵Ka maangpon khümboei BUNYUBOU to mailemashi. Nyi ngebüa ladangkei maangleman teki.

⁶Nyi kümbü pendoua BUNYUBOU damenashi hoba haoei ka la lamnyu tangbü kho lenlabü.

⁷No jembü lolo ka thea songsido kibou dogo tedam. BUNYUBOU to soumo hatashi hoba shabü ka bangashi.

⁸Kho kaibü mang shanga shat semtibü hoba kaibü lo shanga moli phatko kilabü.

⁹Kaibü kao ka longbü maibouthamei BUNYUBOU to lembüei hao hangenashi.

¹⁰Khei yingalonga kaibü bung nyakei shenlabü, hoba kaibü jephot ka ih sopbojaiko koulabü.

¹¹Kü shou, BUNYUBOUei tangtikubü temangsen, ayingsi haoei hakbüei no tüotenong.

¹²Bou cheei jembü maangshikbü shou thepetbü tegü BUNYUBOUei haoei sanoubü shuong thepetda.

¹³Aoei songsihon hapda, aoei ditenbü pailetda kho mütei haüa.

¹⁴Aieilausi sao kho chandinam tokei aei maibou hoba sao kho hon tokei khaibou.

¹⁵Songsihon kho namseklaang tokei namsek hoba nyi mangsühbü aitokei shanyola athük.

¹⁶Nyaksinam si nyensang nyenhang tegü songeihonei kaibü salang kuda.

¹⁷Songeihonei kaibü salang sünga maangamaibü hoba khümetangetbü lam to leida.

¹⁸Aoyouei sao to pametda khübü shanga sao kho langkei bunyu che ki, aoyouei sao to pametda haoen to olinbou dogo lauda.

¹⁹BUNYUBOUei haoeibü songeihonei kaodak yaükei, haoeibü hapbü ngebüei müh sengan phokei.

²⁰Haoeibü songei- honei yungnyu koutida, hoba sangmei ka kaodak to lang yantikuda.

²¹Kü shou, ditenshuokenbü si songsihon hatlepashi, ladangkei haoen ka jungka tesatti.

²²Hobaje haoenei kala langkei yoa maangamaiko olinbü jankulabü.

²³No kaibü lama ongayasetham khei youa ongkei akühko hauenlabü.

²⁴No ladang yepshang to haulaje ühütlabü, hoba no langyang sünga nyeketlouko yeplabü.

²⁵Mangde müt amaibü yeithu yeinak tegü loua tegükei no ai maangmau onat akilabü.

²⁶BUNYUBOUei no püetlabü, haoei no tina amintilabü.

²⁷Ladang ong nyi maibü kümla thüklaje, khambo kibü shuong to khei maibü kümashi.

²⁸Nyi tou thuila thükan kian ladangkei kaibü lepbou to, “Ngiet thuikho, haiteishi” dogo telau.

²⁹Ka yoa maanglembo kibou kaibü lepbou khulimbo huon tetak; hao ka yoa ka to maanglemenko kida.

³⁰Ka to aikei amaibü küman akilonga, nyi mangthem müto pheyophanyo oyophetyoko tohau.

³¹Ikoksimbü müt to nyi tedüh, hoba haoeibü hangsilam che ongkei tepien,

³²aieilausi BUNYUBOUei shedbü kümbü mütshuong mangsenda, lausikei maang tangbü shuong to haoei maang leman kia.

³³Amaibü mütshuong chema BUNYUBOUei shedsikhau phokuda, lausikei saopobü mütshuong chemsibung haoei haükuda.

³⁴Mü awealaubü mütshuong haoei weko aki, lausikei eaaoabü mütshuong to haoei maangshikda.

³⁵Songbüdobü mütshuongei soneikangbü phet phanlabü; lausikei ngoubü shuongei himou hapda.