Read Chang Naga TETENTANBÜ 30 Bible Online

TETENTANBÜ 30 - Chang Naga bible

TETENTANBÜ 30

¹Habü ho Jake shou Agureibü tang khitbü ngüh: “Mühghaü kü yoa aki, Mühghaü kü yoa aki, hoba ngo lai lela?

²Ngo müt tegüje aying, meisiau ong phatkei. Müt to kijan ditenbü kho kü to aki.

³Ngei lubü songsihon ladangkei aditlet; hoba ngei Mühghaü shangabü jimlatangla angesapbei.

⁴Aoei khuthükbü hapbü ngebüa bunyu yeian chühkei? Aoei haoeibü ika yei lapan jungan chühkei? Ayingsi neia dei senan chühkei? Ayingsi kaodak leilang takan chühkei? Hao ao nyi ngekeilao? Hao aoeibü shou?

⁵“Mühghaüei haoei theletbü pendou kümda. Hobaje lambü shuong pendou shanga haoeibü khümenbü kho ngoukhon aih phatkei.

⁶Haoeibü ngüh to tejin- yo, khei aying longa haoei ka to haklabü hoba no yepeijawebü la yeitilabü.”

⁷Mühghaü, ngei ka ka peisilei den nyi shanga sudajada; ngo ühaijinei nyi kho kü ka teshiletma.

⁸Ngo yepeijawebü ka bangtikai hoba ngo keikei tekeiti ayingsi shakei teleti. Kü la ngei shauthüng ong kubü.

⁹Aingenyu ngo shi shena longa no atheletlabü hoba laulabü, “BUNYUBOU kho ao?” Ayingsi ngo sha lelabü hoba kokla haulabü, hoba Mühghaü nyen amlanga jungeilabü.

¹⁰Ladangkei sambü cheei jembubou nyen tesha. Ka to khükla uoklabü hoba ho laüa no khonsaklabü.

¹¹Mütshuongei haoeneibü bousi to khükda uokda hoba lulueibü nyusi to maang ashikda.

¹²Mütshuong haoen kheinyu asaopoko kian haoenei haoen saopoan kia dogo damda!

¹³Mütshuong aoyouei haoen müt maibü dogo damda - oh, haoenei haoen lai maikei dogo damda!

¹⁴Mütshuongei shalebü si khambü shuong thüka keikokombo jungeibüei thük leda; kho tegübüei haoen haoeneibü langkei haangda.

¹⁵Watei yaksa shou nyi kia, hoba ham la nyen “Kü la labü!” dogo nyenkuakei. Ladangkei senyüh ashemlabü peisilei den lei kia:

¹⁶Haibü yemkao, angkongbü yaksa che, langdei khambü kaolin, hoba nyettila athükbü wan.

¹⁷Aoei jembü bou la nyikuda ayingsi jembü nyu noushoulama awealauda, shushou kabü aukhomakmakei haoeibü nyeklang phekan apbulabü hoba hogonei kho shaulabü.

¹⁸Kü shanga yongko ditenla sekbü peisilei den lei kia:

¹⁹Wekekshou müha seengeida, pinyu laang thüka paida, longchem cheei yungnyua jembü haang lamenda; hoba bousu che si yaksa che sanouyoan apda.

²⁰Alanbü saoeibü hangsilam kho ho: Saoei asangalanbü kümda hoba mang yuan apan lauda, “Ngei ai shedbü aküm!”

²¹Kaodakei peisilei den lei honei anatenko lühda:

²²Aaomüt che Choba la yeibü, hoba nyakei photettian kibü ngoubü che.

²³Mangsenbü sao cheei lao hapoubü, hoba sambüsao che, aoei saoeibü sambünyu jeida.

²⁴Kaodaka meisiau hanbü lei kia, lausikei yongko maangli maangsang:

²⁵Min: haoen hau aki, lausikei haoenei sulanga haoeneibü shausiyung thanan phoda.

²⁶Sanshou: haoenkei hau akibü tan che, lausikei haoenei haoen kishang laangpoba kümda.

²⁷Koksüng: haoenei Choba aki, lausikei pendou takshatan shoongda.

²⁸Chemsou: nyi haoen yo ka che ika lapan jungla thükkei; khei yingsi dogokei haoen Choba chema kida.

²⁹Haoen paijinei maangkuko chühlabü hangsilam den lei kia:

³⁰Molosaonyu meisiau pendou to hau kibou, hoba haoei aotokei ühütda;

³¹khungom satsattham paibü aupaang, lonpaang, hoba Choba che haoeibü mütshuong thedanga.

³²Nyi ngoualoua amaibü kümbo yonglaman kia longa nyi kaibü ikei sembunga yeman daman chühashi.

³³Nyi sendei yeiyosi onbü longda, kung to nyatsi kungsii angda; kho tegü thakthak mangmangbüei oyolemen longtida.