Read Chang Naga TETENTANBÜ 31 Bible Online

TETENTANBÜ 31 - Chang Naga bible

TETENTANBÜ 31

¹Habü ho Lemuel Chobaeibü nyuei hao to tang khitbü ngüh shuong:

²“Oh kü shou, ngeibü shia künbü shou, oh ngeibü theyolan- yobü shou, ngei ka la ai lenla?

³Kaibü hau yaksa to suonlambüa tüp; hoba kaibü nyaksinam Choba shuong mautilabüa tüp.

⁴Ditashi, Lemuel, Choba shuongei ih ayungjan ayingsi jaakbümakbü to adühjan.

⁵Ladang haoenei ih yungda, haoenei ngühkhüm maada hoba khonsakbü mütshuong to tangbü kümlabü kibü kho khüpeinyu apda.

⁶Aoyou maulabü ki khübü la ih kho inashi, hoba langkeia khonkua kibü mütshuong la ih kho yungtiashi.

⁷Haoen la yungtiashi hoba haoeneibü shale si aolinbü maatiashi.

⁸“Haoen lolo ngüh alauenbü shuong shanga ngüh laukuashi. Thuila akibü shuong haoen tangbüjanbü shanga ngüh atkuashi.

⁹Haoen shanga laukuashi hoba saopobü matjem lekuashi. Shalebü si khambü tangbüa püetashi.”

¹⁰Mubü yak che aoei hapenla thükkei? Sao phülem to khaibou!

¹¹Saoeibü laoei sao to haoeibü maanglem phoda, hoba ladangkei sha alelabü.

¹²Saoeibü salang sünga maibü kümda hoba ladangkei akomda.

¹³Saoei wi si lei inyaibü lamda, hoba saoeibü ikei maangnyu angko kümda.

¹⁴Sao namyak namseibü long- chem che phatkei, usa ka shausiyung künbada.

¹⁵Langnge asaoko sao pian chemdang shanga shausiyung lamlekuda, hoba sambü sao shuongei kümlabü kümsilei jankuda.

¹⁶Saoei sek che dameida hoba kho jekda; hoba saoeibü ikei thanshaibü namei saoei semlühlaak leda.

¹⁷Saoei shembe kaida hoba sisik laangminko sekoktham kümdaleida.

¹⁸Saoei saoei seibütakbüa pailetbü kibü hapda, hoba nangnak saoeibü wanthung anyetda.

¹⁹Saoei keimeia jungan ji ikdangei bünga jungan lei shikda.

²⁰Shalebü to saoei saoeibü ik sengda; haü, saoei saoeibü ikei shale khonsakbü shuong sühlangda.

²¹Saoeibü chemdang shanga ninthu lenbü to ühütda; aieilausi saoeibü chemdang pendouei lemabü nei neiakei.

²²Saoei yepshang nei imda, hoba nakthüngle sakbü nei inyaibü neida.

²³Kaonyek kabü jaishou shuong setjinei saoeibü lao bakhüna shenan apda.

²⁴Saoei phemba nei si shembe nei takan namyaknamseibü shuong la yaakda.

²⁵Hau si soumo kho saoeibü hele, hoba loulabü thusilam shanga saoei hatko aki.

²⁶Saoei songsido kiko sao sembung ipda, hoba saoeibü lishanga üeisanou ngühsong kia.

²⁷Saoei saoeibü chemdang maila chühko ong kida, hoba haulobü shausiyung ashauda.

²⁸Saoeibü shousi shuong laksepda hoba sao to haünyu dogo lauda; saoeibü laoeikei sao sangko lauda:

²⁹“Yaksa juongei muko küma, lausikei nyi haoen pendou leilanga.”

³⁰Chühsühbü kho khüpettibü hoba saomaibü kho jim akibü; lausikei aoei BUNYUBOU hangenda kho yaksa sangjan.

³¹Saoeibü langle sao la kuashi, hoba saoeibü kümeileiei bakhüna sao sangtiashi.