Read Chang Naga TETENTANBÜ 5 Bible Online

TETENTANBÜ 5 - Chang Naga bible

TETENTANBÜ 5

¹Kü shou, ngeibü songsihon hoba ditenshuokenbü aeto maang kuashi.

²Kheijinei nyi lai tedtangko kila ngelabü, hoba kaibü ngühei nyi hapbü ngebü lenlabü.

³Hangalongbü yaksaeibü sembung ka naodei yanletda, hoba saoeibü sembung khop onang si oliv onang tokei haajang teishikbou,

⁴lausikei thonlamaje saoei no ai lejim akiko khauek ngashibüa apyoda.

⁵Saoei no haibü yemkao aeto leilabü, aieilausi sao haibü lama paida.

⁶Sao langkei lama apaida, lausikei ai haüthükdaje angeko shoongaida.

⁷Hibü kü shousi shuong, tou kü ngüha leashi hoba ngei ai lenda kho ladangkei tema.

⁸Ho tegübü yaksa che ka bangashi hoba saoeibü koukhün nyangko ongkei tohau.

⁹Ayinglonga, kaibü nyensang nyenhang müei lelabü hoba no heahanga onou akibü ika hailabü.

¹⁰Haü, yenbou shuongei kaneibü nyaksinam pendou langlabü hoba kaibü langle küksithang ik to satlabü.

¹¹No haibü yepshanga wiko lengan kijinei kaibü mütmang phe shaukhümlabü.

¹²Hobaje nyi, “Ngei müei tangtikubü hoba hakbü aila asunglet ma?

¹³Ngei ngeibü lenbou ngüha ale, ayingsi ngei khübü to maang aku.

¹⁴Hobaje mokkeimokko ngo lolo pühthea himou baukei,” dogo laulabü.

¹⁵Ka yak to maanglem phoshi hoba kaibü sanou sao la ong kushi.

¹⁶Lubü yaksaei bukbü shousiei ka to amailabü.

¹⁷Ka shousi shuong ka to thuila ong chingen yaangentishi, lausikei tangkabü shanga teyingti.

¹⁸Hibü kaibü yak to maangshikshi hoba sao yoa kaibü olin kishi.

¹⁹Saomaibü meishi saoen che tegü hoba chühsebü meishi saoen che tegü, saoeibü sanouei kaibü maangpon senyühshemtishi, hoba saoeibü sanouei ka to ponpen jemtishi.

²⁰Kü shou, nyi kaibü sanou lubü yaksa che la aila kula? hoba nyi mü yak to aila dühla?

²¹BUNYUBOUei nyi kümbüleibü ajanjan pendou lomda.

²²Müt amaibou kho shabü sung che ki, hoba hao jembü shabü kümaleia minda.

²³Aishanga hao jembü lolo thepetbü aki hoba ngoubü loubü yaangsepbüei hao haoeibü hee to jinda.