Read Chang Naga TETENTANBÜ 6 Bible Online

TETENTANBÜ 6 - Chang Naga bible

TETENTANBÜ 6

¹Kü shou, nyi müt ateibü sanghsiyung künkula theletlao?

²No kaibü jembü ngühei laplao hoba thebülanbüa minlao?

³Kü shou, khei no müt ateibü hauei hatlepakei; kho ka satenla no hauan hao to suajaashi.

⁴No lolo teyep, ayingsi hak ongkei teso.

⁵Au che sung ka satenbü tegü ayingsi meishi che meikipbü ik ka satenbü tegü satenashi.

⁶Haulobü mütei mineibü langkei ka ditletbü lejan.

⁷Haoenei leiyeibü ayingsi songdakbü aki,

⁸lausikei haoenei poang shanga sulanga shausiyung thanda.

⁹Haulobou, no lalokche yepla? No yepbü ka ladang pila?

¹⁰Haoei lauda, “Ngo longche nyeket shikho hoba ik shenyoan tuisho hak sokho.”

¹¹Lausikei hao ladang yepda kheijinei shale kho sekbülakbü insiaubu jungbü soshau soyungbou che tegü loulabü.

¹²Hangalongbü müt amaibü shuong sükbünongbü ngüh lauko paida.

¹³Haoenei no khüpettila nyeksheman, you laian lenko hoba ikji shean lenda.

¹⁴Huonkoyouko khüpettibü haoeibü maanga phoan haoei shabü huonsiyou takko pendoua oyophet- yo wenda.

¹⁵Khoei hatlamoklabü thushed tongde loulabü, hao hakde leilulabü hoba kho aieikei amaitienlabü.

¹⁶BUNYUBOUei aman apla athükbü kümsilei den lak si nyet kia: Yonglambü thenyek, yepeibü lishang, shedbü akibü sii angtibü ik. Shabü huonsiyou takbü maangpon, shedbü kümla panteiko laangbü you; Yepeijawebü aukabü, jaisinasi shuong yoa oyophetyo pungentibü müt.

²⁰Kü shou, kabouei sakkubü kümashi, hoba kanyuei lenbü ladangkei tema.

²¹Habü ho ka maangpona thanan phoashi hoba maangpona ponpendou khinan phoashi.

²²No paijinei haoeneibü songlenei no leilabü, hoba no yepjinei haoenei no lomlabü, no pijinei haoenei ka to joyolabü.

²³Aishanga ngühkhüm kho hantin hoba songlen kho ngesakbü ki. Tangtila hakbü kho langkei lamnyu ki.

²⁴Hoei no asangalanbü ka hoba mü yak ngüh teibüei suletbü ka senetlabü.

²⁵Sao saomaibü ka maangponei tedüh, ayingsi saoeibü nyeksiei no tesuletti.

²⁶Aieilausi asangalan sao che kho wenon cheei jekla thükkei, lausikei asangalan saoei langkei kho haüko kuokko lamda.

²⁷Müt cheei haoeibü nei ajuoktiko, jembü khukua wan tonla thüklep lo?

²⁸Müt cheei haoeibü youa uautiko wankak yasebüa nakla thükasao?

²⁹Kho tegü aoei mü yak to jamlaje thushed yaang kia, aoyouei kho tegü kümda khonsak haplabü haang.

³⁰Kokbü che hao müh phamjinei haoei hao müh maitila shausiyung koksi mütshuongei hao amangsenda.

³¹Lausi dogokei hao lapenalonga haoei nyetnei thüngei shemngaila haoeibü chema kibü nyaksinam khümbo kujan.

³²Lausikei aoei asangalanda hao songsido akibü; aoei khei jungeida hao jembü lolo leiluda.

³³Hao himou bauko ngümeilabü hoba haoeibü himou haman üpenlabü.

³⁴Aishanga nyekto shatbüei müt che maangpok angtida; hoba haoei phok lamjinei phokei adamlabü.

³⁵Ngaingoubü aikei haoei asungletlabü; ayingsi jongsak juong kuasikei hao maang ühailabü.