Read Chang Naga TETENTANBÜ 7 Bible Online

TETENTANBÜ 7 - Chang Naga bible

TETENTANBÜ 7

¹Kü shou, kü ngüh jungeiashi, hoba ngei sakkubü shuong thanan phoashi.

²Ngei sakkubü shuong jungeiashi hoba lang kiashi; ngeibü songlen kho kaibü nyeklang tegü maangsangko phoashi.

³Khübü kho nyi kaibü ikjishoua kaiashi hoba kaibü maangpona doan phoashi.

⁴Songsihon kho kaibü nousina tegü, hoba shuokenbü kho kaibü maangjambou tegü jungeiashi.

⁵Khei yingsije jim akibü yaksa ngüh deiko laubü ka no püetlabü.

⁶Nyetche ngei ngeibü chem koulom ka chühko kikei.

⁷Hobaje ngei songlanbü heshou juong hapbei hoba chühsi haoen yoa müt che shangshenetnyu ditenbüa shalean hapbei.

⁸Haoei khongnyu danko haujinei yaksa kibü nongbü aeto dankei.

⁹Hobaje chasem jijimomoa hoba nangnak metuphanga haoei saoeibü chem aeto haukei.

¹⁰Hobaje kheijinei khongshongla jajasasa yaksa lamleettian maangli maangsang maangpon yeman saoei hao haüyokei.

¹¹Sao sembung pipibü hoba himou akakbü khonga ong shoongaibü yaksa che kikei.

¹²Ayingsi sao khonga namyak namseishanga hoba nongbüsaibü pendoua saoei haiteida.

¹³Saoei heshoubou kho lapan sungan hao to sembung shepbei, hoba thenyek shangtüngtham küman lauda.

¹⁴“Ngei lembü kulabü lele longkei hoba tat ngei thebülanbü kua.

¹⁵Khoei ngo ka to haüyola khametnyu loukei, hoba ngei no hapa.

¹⁶Ijep kabü panpanlanlanbü si dolobü nei lenglengbüei ngeibü shen seilepakei.

¹⁷Ponlem hibü jen si ponlem hibü bu hoba phoulo onangei ngeibü yepshang nyaktiakei.

¹⁸Kaiya! Ngeyang sühko setieibü sanouei shentikho hoba seti lolo sanoua haksoyokho.

¹⁹Aieilausi külao chema aki. Hao wakou saako sada.

²⁰Haoei nam juong künan haua hoba hao littho khüpan lunglabü.”

²¹Sao ngüh teibüei hao suletkei hoba hao saoeibü ngüh inyaibüei thüktikei.

²²Mangde hao sao yoa haitishang to masu pongsu leian haubü tegü ayingsi meishi tina minbü tegü hauko kikei.

²³Laujinei kipbü haoeibü maangpon apaishongko, auei jembü langkei shanga angeko sunga minla panteiko haubü tegü hauko kikei.

²⁴Hibü, tou, kü shousi shuong, kü ngüh ditashi, hoba ngei ai lendaje kho to maang kuashi.

²⁵Kho tegübü yaksaei ka maangpon teleiyeiti, sao phai tesemei.

²⁶Saoei müt juong leilutia hoba wesi awekhümbo shemtia.

²⁷No saoeibü chem to haualonga, no haibü yemkaoa kia; haishang yaangbou kho ho.