Read Chang Naga TETENTANBÜ 8 Bible Online

TETENTANBÜ 8 - Chang Naga bible

TETENTANBÜ 8

¹Ditshi! Songeihonei ngekda. Ditenbüei saoei ngüh alongda lo?

²Lamnyu nyangko shongh khua hoba lambheka sao loda.

³Sangnyu to atshang bakhün napheinei saoei ngekda.

⁴“O khunak shousi, ngei kan to ngada; hoba kaonyudaka müt pendou jungto ki.

⁵O kan songlanbü shuong, songsido ditletashi; kan ngoubü shuong maangpon yemashi.

⁶Ngeibü shanenbü ngüh to ditashi; ngei kan la lenbü pendou tangbü ong ki.

⁷Ngei ai lauda kho ngühmai; yepeijawebü kho kü thea mangsenlabü.

⁸Ngei laubü pendou tükde ki; sükbünongbü ayingsi ajan ayingbü aikei aki.

⁹Ditenshuokenbü müt la kho shangashatetnyu ki; Songbüdobü shuong shanga khübü kho tangetnyu ki.

¹⁰Chandinam toje ngeibü songlen pienshi; hoba shanenbü hon toje ngeibü hapbü ngebü pienshi.

¹¹“Ngo songsihon, ngo namseklaang to khaibou; kanei mangsühbü aitokei ngo takteila athük.

¹²Ngo songsihon, hoba ngei ditenshuokenbü kia; Ngei hapbü ngebü hoba matjem maibü kia.

¹³BUNYUBOU to soumo hatbüei amaibü mangsenda. Yonglam, jajasasa, amaibü lam hoba alualak ngühsidei ngei mangsenda.

¹⁴Ngei kümthen kümda hoba kho jungan hauda; kü to ditenbü kia hoba ngo hau kia.

¹⁵Ngo danko Choba shuongei songdakda, hoba songbüyaübü shuongei ngühkhüm deikhüm maibü kümla thuida.

¹⁶Kaodaka songdakbü wekoei ngeibü thuibü danko songdakda; hoba yaangenbü si matjembü shuongeikei kho tegü kümda.

¹⁷Kü to sanoubü shuong to ngei sanouda; hoba aoyouei ngo sonanepbo lamda haoenei ngo hapla thükkei.

¹⁸Keisiyaang si nyensang nyenhang ngeibü, ngei kulabü; haü, thüksimin hoba naangmaibü.

¹⁹Kanei kü ka ai hapda kho hon si chandinam tokei maibou.

²⁰Ngo saopobü lamnyua paida; ngo lam tangbü phai semda.

²¹Kü to sanoubü shuong la ngei nyaksinam janletkuda; hoba haoeneibü chem nyakeinamei shentikuda.

²²“BUNYUBOUei shangiedbü to shaang haoeibü kümsilei khangbüa ngo yaükei.

²³Kaodak mokhangjinei püngla khangla thama haoei ngo shaanglanyua kümbei.

²⁴Yungnyu haübü akijinei ngo bukan kiteikei; kheijinei deikük akitei.

²⁵Shongh suokbü ayeitoua, hoba shonghshou akitoua ngo bukan kikei.

²⁶Kheijinei haoei tokei kaodak ayingsi khongthu, ayingsi kaodaka shaangbou thamon akümbo kikei.

²⁷Haoei mühshuong sengjinei hoba yungnyu thüka haoei mühthon chamang komtijinei ngo khonei kiteikei.

²⁸Haoei müha sangmei shangtijinei, yungnyu deikük yaüjinei;

²⁹yungnyu shuongei haoeibü ngühkhüm aleilujan dogo; haoei yungnyu la ngühkhüm kujinei; kaodak denshang haoei pienjinei;

³⁰kheijinei ngo hao junga thükkabou chemdangbou che tegü, hoba hao thedanga chalou angbou hao olintibou che tegü ponpen kikei.

³¹Ngo olinlabü kho kaodak hoba khunakshousi yoa kikei.

³²“Hibü tou, kü shousishuong, kü ngüha leashi; aishanga ngeibü lamnyua paibü shuong haübou.

³³Kan la ai lenkei kho ditashi, songsihon kiashi; hoba kho tüpyo.

³⁴Aoyouei chalou angboua ngeibü bakhüna lomda, hoba ngeibü koukhüna haiyeida haoen olinbou. Kü ngüha lebü müt kho haübou.

³⁵Aoyouei ong ngo lamenda haoei langkei hapda; hoba BUNYUBOU üeisanou haplabü.

³⁶Lausikei aoei ngo alamda hao jembü lolo akngaida; aoei ngo mangsenda haibü sanouda.”