Read Chang Naga TETENTANBÜ 9 Bible Online

TETENTANBÜ 9 - Chang Naga bible

TETENTANBÜ 9

¹Songeihonei saoei chem danga hoba laang thaonyu nyet keakei.

²Lem shanga saoei saoeibü shatsinam haitia; saoei saoeibü semlüh ponlem kheiyoa, hoba thungsiphau phoshang lamlea.

³Saoei saoeibü sambü sao shuong sangnyu lamkhong to müt ngala hautia.

⁴“Kaiyeta, songlanbü mütshuong! hoba ngoubüloubü shuong!” dogo haoei lauda.

⁵“Kaiya, ngeibü shausiyung shauashi, hoba ngei kheiyobü semlüh dei yungashi.

⁶Haang- alongbü danshuong apyoashi hoba lang kiashi, hoba ditenbü lamnyua paiashi.”

⁷Nyi mü awealaubü müt tangtikusi nyi no lolo nyensha nyenda hapda. Nyi shabü müt to hakalonga nyi jembü lolo nyenshed haplabü.

⁸Mü la nyikubü müt che to ladangkei tühak; aingenyu haoei no mangsenlabü. Lausikei sangbüdobü müt che tangtikuashi haoei ka la soumo kulabü.

⁹Songbüdobü müt la hangsilam shean lenashi, hoba hao aei sangladolabü. Saopobü müt che la ai ong lenlaje hao hapbü ngebüa jinyolabü.

¹⁰BUNYUBOU to hatbü kho songsihon khangshang. Saopobou ngebü kho ditenbü ki.

¹¹Aishanga ngo danko kaibü salang chalou hoba kaibü salang po loutikulabü.

¹²No sangadoa longa, songsihon kho kaibü jongsak yinglabü, hoba nyi nyikualonga kongbou kho no yeilabü.

¹³Ngühlakbü yaksa kho ngoubüloubü, sao songlan, aitokei ihimouda.

¹⁴Sao saoeibü koukhüna ayingsi pühshon setshang suokbüa setda,

¹⁵hoba aoyou lulu kümtoleito hauko dandaphaida haoen shuong to ngada:

¹⁶“Kai- yeta, ngoualouabü mütshuong!” Ange adobü mütshuong to saoei lauda,

¹⁷“Kokbabü dei kho teibou; hoba kokbabü wentek kho jemoubou.”

¹⁸Lausikei haibü shuong khünei kia dogo, khei yimkao haüboua saoeibü yenbou shuong kia, dogo haoei angeda.