Read Chang Naga SONGLENDOLEN 1 Bible Online

SONGLENDOLEN 1 - Chang Naga bible

SONGLENDOLEN 1

¹Jerusalem kabü Choba, Dawideibü shou, Songlendolenboueibü ngüh.

²“Lejim aki, Lejim aki”, dogo Damthenchühbouei lauda, “Kong ka kongmaimai, pendou kho lemailela kongkong.”

³Mühnyu phanga mütei kümbü, hao hübü mangbü ku ai?

⁴Meten che satda, hoba lubü meten che louda; lausikei kaodakje ponpen kida.

⁵Chanyu kho longda hoba chanyu kho nepda, hoba hao longbü aeto nyibou ngaida.

⁶Yeiei chanep aeto souda, hoba chaangbou naphei to sepeida haoei jembü lama athakko tuongjung hauda hoba sepeisaeko kaida.

⁷Shumang pendou yungnyu to kouda, lausikei yungnyu kho ashenda, lanei shumang kouda khüto ong nyibou kouda.

⁸Ajanjan pendou damlabüei shenakei, mütei ho alauen, hapbüei nyek ashenda.

⁹Khei ai kikei kho ong kilabü; ai ong küma kho ong kümlabü hoba mühnyu phanga aikei haanbü aki.

¹⁰Chühashi, ho haanbü ki dogo mütei laubü peisilei che kilao ma? Sen to shaangbü meten shuong haanga ho kikei.

¹¹Shangied haüthükbü aikei adamenlabü, ayingsi phaila loubü yoa loula kibü haüthükbü aikei adamenlabü.

¹²Ngo damthenchühbou kho Jerusalema Israelbü thüka Choba kikei.

¹³Hobaje mühnyu phanga kümbü pendou shanga ngeibü hapbü ngebü songeidoei lamla hoba lamenla shanga ngei maang kukei, ho khei Mühghaüei müteibü shousi shuongla akong- akangko kila shanga kubü kümsilei sekbü che.

¹⁴Mühnyu phanga kümbü kümsilei pendou ngei hapda; hoba chühashi, pendou amlang hoba yei to longyobü ong.

¹⁵Laobou koma kho tangla athük hoba ai ong aonlangko ki kho wela athük.

¹⁶Ngei ngeibü maangpona hai laukei, chühashi, kü to shaang Jerusalema kibü pendou to ngei songsido yaangbou hapa; haü, ngeibü haiyepei hapbü ngebü hoba ditletbü yaangbü danthetjung loua.

¹⁷Hobaje ngei songngedonge hoba langet angbü si ngoubüloubü ngela ngei maang kukei, hoba ngei chühenda, khei khokei amlang ong hoba yeia haujembü ong.

¹⁸Aishanga songsido aei kialonga maangpon shale aei ki, hoba hapbü ngebü haalonga maangmau onat aei pühda.