Read Chang Naga SONGLENDOLEN 10 Bible Online

SONGLENDOLEN 10 - Chang Naga bible

SONGLENDOLEN 10

¹Meishou haibüei ponlem hibü kümboueibü moli nyaülüm hitida; kho tegü songsido akibü hanbüshou cheei songsihon hoba nyenhang shopmauda.

²Songsido kibou kho maiphei to hauda, lausikei songsido akibü maangpon kho nanae to hauda.

³Haü, tokei ladang songsido akibü lamnyua paida, haoei aditenda, hoba haüyobü weko to ngo ngoubü dogo lenda.

⁴No khulimbo songdakbou khau angsi kaibü younak tejeilei; aieilausi sangsembo kibüei shedbü yaangbü kho songoktida.

⁵Mühnyu phanga songdakbü shuongei mashikbü ka longbü tegü amaibü che ngei hapbei.

⁶Songsido akibü thükkabou setshanga setjinei songsido kibü phangkabou setshanga setda.

⁷Ngei Choba shuong kaoa youei paiko hapjinei, sambüyaübü shoujitshou shuong koli taka setan hapbei.

⁸Aoei püngkhün thuda hao khüto atetda, hoba aoyouei kümthang khapyetda pinyuei hao to püplabü.

⁹Aoei laang thüngda, khoei hao leilulabü, hoba aoei bu shenda khünei thushed kia.

¹⁰Wou kho nyenalonga hoba haoei in kho aulonga hao aei hau jemjan, lausikei khei leiyeila shanga songsido khamda.

¹¹Hao amüjinei pinyuei püpalonga kheijinei mübou shanga ku aki.

¹²Songsido kibüeibü ngüh khoka onoubü longda, lausikei soungouabü sembung khopei hao suida.

¹³Haoeibü ngühlau khangbü kho ngoubüloubü hoba haoeibü ngühlau thonbü kho langet angbü ki.

¹⁴Songsido akibü mütei ngüh phopan lauda, lausikei mütei ai laulaje angekei, hoba hao phainei ai haüthüklaje aoei hao to lenenla?

¹⁵Songsido akiko kümbü khoei hao hütimangtida, aieilausi haoei sangnyu to atlabü lam angekei.

¹⁶Kaibü Choba nashou yingalonga hoba kaibü songdakbü shuongei ngeyang sühko lem lialonga, O kaodak, ka shanga ügütü!

¹⁷Ladang kaibü Choba yaangenbü phang yinglaje, hoba ladang kaibü songdakbü shuongei jaakla shanga aying, lausikei hau kila shanga jiha- phaia ong shaula yunglaje, O kaodak, ka shanga olinlabü.

¹⁸Haulohaushedbüei chemdak shemyettida; hoba akümaleibüei lang sangtida.

¹⁹Ekyonyiyola shanga lem kho lida, hoba ihei langkei kho olintida, hoba pendou shanga nam apsileda.

²⁰Kaibü maang- ponei ongkei Choba to tekhüktüok; hoba kaibü shen kakei tekhüktüok; aieilausi mühkabü au shuongei kaibü ngüh kho thonlabü, ayingsi kaakyembü shuongei kho lenlabü.