Read Chang Naga SONGLENDOLEN 11 Bible Online

SONGLENDOLEN 11 - Chang Naga bible

SONGLENDOLEN 11

¹Kaibü shausiyung kho deitaka phinashi; aieilausi nyi chalou juong kian kho hapmeilabü.

²Phejan nyet la, khei set la sühko janashi, aieilausi kaodaka ai amaibü loushedlaje nyi angekei.

³Sangmei kho deiei shenan kialonga haoenei kaodak to lang loutida, hoba bulong kho lae aeto tuonglaje khünei hao kilabü.

⁴Aoei chamai langmai chüheilaje haoei sek ashaplabü; hoba aoei sangmei to chühko khüplaje haoei you alatlabü.

⁵Nyi yeilam angebü tegü, ayingsi yaksaei nasetshanga nashoueibü lo kho lai chingda angebü tegü kho maimai Mühghaü aoei pendou kümda haoeibü kümsilei kho nyi angekei.

⁶Ngeyang kaibü youli kho phinashi, hoba chasem kaibü ik tesenet, aieilausi laobou lilabü mailaje, ho si kho ayingsi penyiham kho jetei mailaje nyi angekei.

⁷Maimaitham ngesakbü kho teibü hoba nyekei chanyu to chühlabü kho maanga mailabü ki.

⁸Haü, müt che kaodaka po juong salangko kialonga, khübü pendoua hao olintiashi, lausikei hao la nakthühbü chalou shuong damentiashi; aieilausi khübü khokei juong yinglabü. Loula kibü pendou amlang ong ki.

⁹O mütaobou, no mütao jiha olinashi; no mütao jiha kaibü maangponei no thungei jangeitiashi, hoba kaibü maangponei leibü aeto hoba kaibü nyek to loubü ae hauashi, lausikei ho ngeashi, khei khübü pendou shanga Mühghaüei no matjemlabü.

¹⁰Hibü kaibü maangpon ka maangmau onat apashi, hoba kaibü mang ka khonsak khonku sungenashi; aieilausi no nashouabü hoba mütao langkei kho amlangbü ki.