Read Chang Naga SONGLENDOLEN 12 Bible Online

SONGLENDOLEN 12 - Chang Naga bible

SONGLENDOLEN 12

¹No mütaoa no Kümbou damenashi, ayinglonga chalou amaibü shuong louan, hoba po kho danjung loujinei nyi laulabü, “Ngei habünei maanga mailabü aki.”

²Ayinglonga chanyu kho hoba ngesakbü kho, hoba litnyu kho, hoba khanshoulitshou shuong kho nakthühtham aplabü, hoba lang louan phaia sangmei onshailabü.

³Kho chaloua chem lombü shuong lühlabü, hau kibü mütshuongei khüpetlabü, hoba shemshibü shuong nanglabü, aieilausi haoen shisho ong yeikei; hoba koulom ka chühbü shuongeibü nyek yuian apbei.

⁴Hobaje khonga kou khinlabü, ladang shemshibü ngühlang koungailaje, hoba müt cheei au wibü ditan moklaje, hoba chia laubü nouyangshou shuong shijung ngailaje,

⁵haü, thükaenei ai ki khüto haoen hatda, hoba lama haoen hatlamoklabü kilabü; hoba almond bulong pon punglabü, hoba koksüng lulu lolo thopjung ngaida hoba mangsüh maangdak akilabü, aieilausi müt ponpen kishang to hauda hoba manghaapbü shuong khong- yaanga shoongaida,

⁶chandinam namlüh athettoua, honeibü phauyaang aphetnyinjinei, ayingsi kailong you yungdeia aleilujinei.

⁷Hobaje shaangla kibü tegü thamngu kho kao to sepeida, hoba soushouje kubou Mühghaü jungto ong ngailabü.

⁸Lejim akibü yoa lejim akibü, Songlendolenbouei lauda, pendou lejim aki.

⁹Songlendolenbou kho songsido kibü ong aying, haoei mütshuong to hapbüngebü lenkei, haü, haoei seret hauan chühko takteiko hoba lambo tetenshuokenbü juong yenei yenko yoshaikei.

¹⁰Songlendolenbouei ditmangsühlabü ngüh shuong hapla lambei hoba tangshaitham ngühmai ngüh dokei.

¹¹Songsido kibü ngüh kho aubu tegü, hoba sanlombü cheei yoshaian kubü songbüdobü ngüh kho kojal kaangkhühtham thüngbü phatkei.

¹²Kü shou, khüto yoko ho lauda, maangsangashi; le juong kümsi thon aki, hoba ditletla yongko lambü kho phe hübümangbü ong.

¹³Thonbü kho ho, pendou ditan chüha; Mühghaü to hatashi, hoba haoeibü ngühkhüm jungeiashi, aieilausi mütei kümlabü kümsilei pendouei khüjo kho ong.

¹⁴Aieilausi maibü yingsikei, amaibü yingsikei, huan kibü pendou yoa Mühghaüei kümsilei pendou mat jemlabü.