Read Chang Naga SONGLENDOLEN 2 Bible Online

SONGLENDOLEN 2 - Chang Naga bible

SONGLENDOLEN 2

¹Ngei kü maangpona laukei, “Kaishima, ngei no olinbü takteikho; kamaangleko olinashi,” lausikei chühashi, khokei amlang ong kikei.

²Ngei laukei, “Ekyo nyiyobü kho ngoubü hoba olin maangmai kho ainei lela?”

³Haoen langkei salang tuishoa müh phanga müteibü shousi shuongei kümla shanga hapbüngebüei ngeibü khu leiyeiko ihei ngeibü maang lai olintienkei hoba ngoubü kümaleia lai ik atenkei, kho ngeibü haiyepei lambei.

⁴Ngei kümsilei yaangbü kümbei, kü shanga chem shuong dangkei, hoba semlüh kekei.

⁵Kü shanga chipen ba hoba kü shanga buheklaak kümbei hoba ngei khübünei bulong phang juong kekei.

⁶Bulong shuong yeman kishanga dei lakla shanga, ngei deikhün thukei.

⁷Ngei aaomüt bousu yaksa jekshaikei hoba ngeibü chema bukbü sambüyaübü shuong kikei; hoba Jerusalema kü to shaang kibü pendou to aeibü ngei masu hoba sanlon shuong kiteikei.

⁸Sangle shuong hoba Choba shuong nyaksinam hoba hon si chandinam ngei haushaikei, ngei bousu si yaksa chia laubü shuong phokei hoba müteibü shou olinla thangnyu juong phokei.

⁹Hibü ngo yaangenkei hoba Jerusalema kü to shaang kibü pendou limjung haukei, hoba ngeibü hapbüngebü songsido kü yoa tokei kikei.

¹⁰Hobaje ai ong ngeibü nyekei dühkei khübü ka ngo asukngai, ngeibü olinbü aikakei asukngaiti, aieilausi ngeibü kümsilei pendoua ngeibü maangpon olinko kikei; hoba ngei kümbü pendou ka ngeibü ku ho kikei.

¹¹Kheijinei ngeibü ikei kümbü kümsilei pendou hoba ngei kho kümla hübü shanga chühkei hoba chühashi, pendou amlang hoba yei to longyobü ong kikei, hoba müh phanga ku ai akitei.

¹²Hibü ngei ngo lolo songsido kibü langat angbü hoba ngoubüloubü damanchühla sepeikei, aieilausi Choba phaito loubü müt khoei ai kümenkei? Haoei shaangla ai kümenkei kho ong kümenkei.

¹³Kheijinei ngei ho hapbei, khei ngesakbü kho nakthühbü to latetcheei maikei khütetche hapbüngebü kho ngoubü toje maikei.

¹⁴Songsido kibüeibü nyek kho haoeibü khua thonkei, lausikei songsido akibü shuong kho nakthüha paida, khei yingsi dogokei, ngei ho chühenkei, khei haoen pendou to thu jetei louda.

¹⁵Kheijinei kü maangpona laukei, “Songsido akibü to haüthükbü tegü kütokei haüthüklabü, kholonga ngo ai aei songsido ki?” Kheijinei ngei ngeibü maangpona hokei amlang dogo laukei.

¹⁶Aieilausi songsido kibükei songsido akibü tegütham ponpenje adamenlabü, aishanga loulabü chalouaje pendou maan apan kilabü.

¹⁷Hibü ngei langkei kho mangsenkei, aieilausi müh phanga kümenbü kümsilei shuong kü shanga maangto shatlabü kikei, aishanga pendou amlang hoba yei phainei leiyobü che ong ki.

¹⁸Kü phaito loulabü müt la ong phoyokulabü dogo hapan müh phanga ngo hüko kümbü ngeibü kümsilei pendou ngei mangsenkei.

¹⁹Hobaje hao kho songei keibü yingla si songei akeibü yinglaje aoei ngekei? Khei yingsikei ngeibü kümsilei ainei ngo hükei hoba müh phanga hapbüngebü lenkei, khübü kümsilei pendou thüka hao bunyu yingla, hokei amlang ki.

²⁰Hibü müh phanga kümbü ngeibü kümsilei pendou apyoan ngei kü maangpon haiko kikei.

²¹Aieilausi che cheje aoei songsido kiko hoba hapbüngebüei hoba maangli maangsangei kümbei, kho pendou aoei khünei ühü amang, hao la hao maangleko apyokujan. Hokei amlang hoba maangto shatlabü che.

²²Mütei hübümangbü senyüh sheibü laobou künan haoei müh phanga kümda, hao pendou shanga haoei ai ki?

²³Aieilausi hao langkei salang sünga maangmau onat ong; nangnakkei haoei hakso ühüpda, hokei amlang.

²⁴Müt shanga jembüei kümenleienbüa olinbü hapbo shaubü yungbü to limbo maibou ai aki. Hokei Mühghaüeibü ik ka ong dogo ngei hapbei.

²⁵Aishanga hao ayoko aoei shauenkei hoba maanga maiko kienkei?

²⁶Aieilausi aoei hao olintida hao la Mühghaüei songsido hapbü ngebü hoba olinbü kukei, lausikei shabü shuong la yoshaila hoba thanlabü kümsilei kuda, khei Mühghaü maang olintibü la kula shanga ong, ho amlang hoba yei phai shibü che ong.