Read Chang Naga SONGLENDOLEN 4 Bible Online

SONGLENDOLEN 4 - Chang Naga bible

SONGLENDOLEN 4

¹Tokei nyibou müh phanga shieikoe kümbü pendou hapbei hoba chühashi, shieikoebü shuong nyeksi hoba haoen haksotibü ao aki; haoen to shieikoebü aenei hau kikei, lausikei haoen maang haksotibü aokei akitei.

²Hibü khoei langkei kibü aoyou tokei lang ki haoen toje haibü aoyou haia, haoen thu maibou dogo ngei dambei.

³Haü, haosi ham toje maibou kho tou ao aki, aoei müh phanga kümbü kümsilei amaibü hapan achüh, hao maibou.

⁴Kheijinei ngei ho hapbei, khei mütei jembü lepbou to nyekto shatbü danko kümsilei pendou hoba maangli maangsang pendou longda hokei amlang hoba yei- phai shibü che ong.

⁵Ngoubüei haoeibü ik semda hoba jembü phe shauda.

⁶Hübümangbü hoba yei shibüa ik penyi toje sangsembo ik khong che kibü maibou.

⁷Nyibou ngei müh phanga amlangbü che hapbei.

⁸Müt che ao hao thenbou aki, haü, shousi ayingsi jaisinakei aki, khei yingsikei haoei kümbü thon aki ayingsi haoei kibüei hao nyekmang ashen, hibü ao shanga ngei hakso akiko kümsilei kümda? dogo haoei ladangkei apheda. Hokei amlang kongkong ki, haü, hokei maang leilubü che hübümangbü ki.

⁹Che toje penyi maibou aieilausi haoenei kümbü shanga mu maibü kia.

¹⁰Aieilausi haosi tuongalonga hao meitangbou cheei hao phonlabü; lausikei mütpem kibou ügütü; ladang hao tuonglaje hao phonla ao aki.

¹²Tokei müt nyi liko yepsi haosi lematham ki, lausikei mütpem kila thüksikei müt nyi khulimbo haoei lan athüklabü. Janglüh pem sem shiyobüje tongde athetda.

¹³Jaishou songsido akibü Choba che aoei chemphang songlen ngüh sungletla angekei hao toje shalebü songsido kibü heshou che maibou.

¹⁴Aishanga sanglea hao shalebü yingasikei thüngshang ka haoei Choba setshang sühkei.

¹⁵Müh phanga langkeibü hoba heshouboueikei aoei Choba jeila kikei, pendou ngei hapa.

¹⁶Müt pendou wesikei awekhümbo kikei: haoen pendou thüka hao kikei. Lausikei phaila loubü shuongei hao to aolinlabü, maimaitham hokei amlang hoba yei shieibü ong.