Read Chang Naga SONGLENDOLEN 5 Bible Online

SONGLENDOLEN 5 - Chang Naga bible

SONGLENDOLEN 5

¹Mühghaüeibü chem to haujinei no maangsangko paiashi; aishanga songsido akibüeibü lembü kubü toje ditla nyangko haubü maibou, aieilausi haoenei amaibü kümda dogo haoenei angekei.

²Kaibü sembung pitpitbü hoba Mühghaü thedanga ngühlaula kaibü maangpon tepantei, aishanga Mühghaü khuthüka kia hoba no kaodaka kia, hibü kaibü ngüh shisho ong yingshi.

³Aieilausi kümsilei juong ka mangh che longda, hoba ngoubüloubü ngüh danko songsido akibü ngüh longda.

⁴Ladang nyi Mühghaü to theletbü che theletlaje kho tongde küman apashi; aieilausi songsido akibü to hao olinko aki. Nyi theletbü kho kümashi.

⁵Theletan akümbü khantoje nyi atheletbü maibou.

⁶Kaibü sembungei no shatilabü lele ngüh telau, ayingsi nyi khuthük hangangbü to shed shona dogo telau, khei ayinglonga Mühghaüei kaibü ngüh khulimbo maangpoklabü, kaibü ikküm ikleiei mautikulep aying lo?

⁷Aishanga mangh juong yeijinei ngüh kongkong juong longda; lausikei nyi Mühghaü to hatashi.

⁸Nyi kaonyeka shale jongle shieikoebü hapalonga hoba ngühmai matjem hoba matmaibü hibü- youbüei jungan haubü hapalonga khünei maang tepang, aieilausi yaangbü dogo weeibü to thükkabou che kia, hoba haoen to thükkabou ki.

⁹Lausikei kaodakeibü ku kho pendou shanga ki; Choba khokei sek khoei samda.

¹⁰Aoei nam to sanouda, namei nyek ashenlabü, aoei nyaksinam sanouda, nyaksinamei nyek ashenlabü, ho amlang ki.

¹¹Ladang peisilei shuong aei haada, shaubü shuongkei aei haada, hoba nyekei chühbü to liman bunyubou kho ai ku ki?

¹²Hansho ong shausikei, juong shausikei sekmoubü shuong nyeket louko yepda, lausikei keibüei apsileko kibü shangakei hao nyeket alouda.

¹³Müh phanga maangto shatlabü che ngei hapa, khei nyaksinam bunyu lean phobü kho hao khonkula ong.

¹⁴Hobaje khübü nyaksinam kho amaibü atei mautida hoba hao nashou cheeibü bou la yeijinei haoeibü ika ai aki.

¹⁵Nyueibü shimong ka longbü tegü nyibou mütkong haulabü hoba haoei ika jungan haulabü lele haoei kümbü ku ai ajunglabü.

¹⁶Hobaje tokei maangto shatlabü amaibü che kia, hao lai loukei kho tegü hao haulabü. Hibü haoei yei shieibü ka ai pailetkei?

¹⁷Haoei salang sünga haoei nakthüh hoba maangto shatbüa dantia, hoba haoeibü senyühsheibü shat hoba maangshat ong aei.

¹⁸Chühashi, ai maibü hoba janbü ki kho ngei hapa. Mühghaüei kubü langkei salang tuisho khümbo müh phanga haoei kümbüa maanga maiko shaula yunglabü, aieilausi kho müteibü thu ki.

¹⁹Mütpem weko ao la Mühghaüei nyaksinam hoba keisiyaang kukei hoba kho shaula hau kukei, hoba haoeibü thu sungletla hoba haoei kümbüa olinbü haplabü ho Mühghaüeibü jongsak ki.

²⁰Aieilausi haoei haoeibü salang chalou juongje adamenlabü, aieilausi Mühghaüei haoeibü maangpon olinbüa phokuda.