Read Chang Naga SONGLENDOLEN 6 Bible Online

SONGLENDOLEN 6 - Chang Naga bible

SONGLENDOLEN 6

¹Müh phanga ngei amaibü che hapbei, hoba kho khunak shousi thüka atshaibü ki;

²müt la Mühghaüei nyaksinam kibükeibü hoba nyensang nyenhang kukei, khei haoei mangsühbü aieikei sha alelabü lele khei yingsikei haoei kho shaula Mühghaüei sei aku, lausikei yenbou cheei kho shauda, ho amlang hoba ho shat amaibü che ki.

³Müt cheei shousi müt saongao buksi hoba po juong hao salangko kisi, lausikei hao songadoa maibü akilonga, hoba aeila leko hao khünshang akilonga ngei laukho, khei hao nasaka haibü maibou.

⁴Aieilausi hao amlang yeida hoba nakthühshang to hauda, hoba haoeibü nyen nakthüh phanga keplepan kia.

⁵Kho to aei khoei chanyu kho ühüp, ayingsi ai angekei; lausikei hao toje kho hakso kibou.

⁶Haü, hao po hajar nyithüng kiasikei hoba maibü ühüplonga pendou kaoen che to ong hauda aying lo?

⁷Mütei kümbü pendou haoeibü sembung to jinla ong, khei yingsikei haoeibü shi ashenda.

⁸Songsido akibü to songsido kibü shuong ainei maibou? Ayingsi langkei kibü yoa paila ngebü shalebüei ai ki?

⁹Maikuko maangtakbü toje nyekei ongkei hapbü maibou, hokei amlang hoba yei shieibü ong.

¹⁰Ai ong yeijung loua, nyen nyenkua, hoba müt kho ai ngebü ong, hoba hao to kaangbousekbou haoei athüklabü.

¹¹Ngüh aei lau, amlang aei yei, dogo hoba müt kho aiei maibou?

¹²Aieilausi hao amlang langkei salang tuisho mangshoubü che tegü danjung haujinei müt shanga jembü langkeia ai maikei kho aoei ngekei? Aieilausi mühnyu phanga haoeibü phejan ai yinglaje aoei ngekei?