Read Chang Naga SONGLENDOLEN 7 Bible Online

SONGLENDOLEN 7 - Chang Naga bible

SONGLENDOLEN 7

¹Nyen maibü kho namseklaang tokei maibou; hoba hainyet kho buknyet to maibou.

²Lemlibü chem to haubü toje manghaapbü chem to haubü maibou, aieilausi müt pendou thonshang kho ki, hoba langkei kibüei haoeibü maanga kho haüko pholabü.

³Maangto shatlabü kho ekyonyiyobü toje maibou aieilausi the angesakbüei maangponje olintida.

⁴Songsido kibü maangpon kho manghaapbü chema kia; lausikei songsido akibü maangpon kho lemlembü chema kia.

⁵Songsido akibüeibü chia ditbü toje songsido kibüeibü hakbü ditbü maibou.

⁶Aishanga chakmaanga jak tühko laibü him songsido akibü ekyonyiyobü kho ki; hokei ai jim akibü.

⁷Maimaitham shieikoebüei songsido kibü ngoubü la yeitida, hoba besa anyemei maangpon yongtida.

⁸Khangjineibü toje thonbüa maibou; hoba natenbü soushou kho yonglambü soushou toje maibou.

⁹Khauangla tepantei, aieilausi khauangbü songsido akibü khukua kia.

¹⁰“Tou toje aila shangied maibou?” dogo nyi tephe, aishanga ho shangabü ho nyi songsido kibüei pheda aying.

¹¹Phetphan yoa songsido kibü kho maiakei, haü, chanyu hapbü shuong shanga ho maibou ki.

¹²Aieilausi songsido kho nam tegü khümet angetlabü ki, khei songsido khoei kho khümenan phoda.

¹³Mühghaüeibü kümsilei kho daman chühashi, khei haoei sükan kümbü aoei tangtienkei?

¹⁴Sangmai hakso chaloua olinko kiashi, hoba khonku onat chaloua daman chühashi; khei mütei hao phainei ai haüthüklaje alamenlabü lele Mühghaüei chekei chekei kümbei.

¹⁵Habü pendou ngei ngeibü kongbü langkeia hapa; saopobü müt che hao saopobüa mauda, hoba amaibou müt che jembü kümsilei amaibü kümbo salang louko hauda.

¹⁶Yonganje tesaopo, ayingsi no lolo yongan songsido teki, aieilausi nyi no lolo leilulabü.

¹⁷Yonganje amaibü kümbou teyei ayingsi no lolo saopobü teyei; kaibü jih asühjinei no aila haila?

¹⁸Nyi ho senetan phosi maikei, kho kakei kaibü ik teliti; aoei Mühghaü to hatda khübü pendou ka satenlabü.

¹⁹Sangnyu chenei songdakbü an toje songsido kibü shanga songsido khoei hau aei kuda.

²⁰Maimaitham kaodaka sao- pobü kümbo ladangkei shabü ashonbü müt maibü che ongkei aki.

²¹Mütei laubü ngüh pendouaje maang teku, khei ayinglonga kaibü sambüei ka to khükbüokbü ditousi amaibula.

²²Aieilausi nyikei kho tegü lubü tokei khükaoka dogo kaibü maangponei ngekei.

²³Habü pendou ngei ngeibü songeidoei takteikei; ngei laukei, “Ngo songbüdobü yeilabü”, lausikei kho kü ka aeibou saan kikei.

²⁴Ai ki kho saabüa kia, hoba aeibou haülangtham, aoei kho lamenla?

²⁵Ngei ngela hoba lamla hoba songsido lamla hoba li pendou phanla hoba khüpbülangbü kho songsido akibü kümsilei hoba songsido akibü kho langet angbü dogo lamla ngei maang kukei.

²⁶Yaksa aoeibü maangpon sung hoba tak hoba saoeibü ika khühbü yangmen tegü ki, sao kho haibü tokei khauekbü dogo ngei hapbei, aoyouei Mühghaü maang haitida sao ka satenlabü, lausikei shabü shuong saoei laplabü.

²⁷Chühashi, ngei ho hapa dogo Songlendolenbouei lauda, den che to takteiyoko longbü kho ngela shanga,

²⁸ngeibü haiyepei athakko lambei, lausikei ühüp; hajar yoa ngei bousu che hapbei, lausikei khübü pendou yoa yaksa che ongkei ngei ühüp.

²⁹Chühashi, ngei ho ong hapbei, khei Mühghaüei khunak shousi tangshaitham kümbei, lausikei haoenei juong lamena.