Read Chang Naga SONGLENDOLEN 8 Bible Online

SONGLENDOLEN 8 - Chang Naga bible

SONGLENDOLEN 8

¹Ao songnge dongebü phatko ki? Hobaje aoei wanenbü lamenkei? Müt che songsidoei haoeibü thenyek ngesaktida hoba haoeibü thenyek atshaibü kho jakshaitida.

²Ngei thungeijangeida, Mühghaü to theletbü shanga dambo Chobaei sakkubü ditashi.

³Hao jungka satla tepantei, hoba amaibü kümaleia tekausak; aieilausi hao junga maangangbü haoei kümda.

⁴Aieilausi Chobaeibü ngüha sei kia; hoba aoei hao to, “No ai kümda,” dogo lauenkei?

⁵Aoei ngühkhüm jungeida, amaibü ai akühshuoklabü, hoba songsido kibü mütei maibü amaibü janenbü jihsiphai ngekei.

⁶Aieilausi khunak shousi khonku khonsak yaang kiasikei, ajanjan pendoua jih che hoba matjem kia.

⁷Aieilausi phaila ai haüthükla haoei angekei; aishanga kho khei haüthükbula dogo aoei hao la lenenla?

⁸Müt aoeibü ikakei soushou senetan phola hau aki, ayingsi haibü chalou thüka haoeibü sei aki, wapyoa aokei asattida ayingsi hao la kubü amaibü ka hao alongtilabü.

⁹Ho mühnyu phanga kümbü kümsilei pendoua ngei chühjinei ngei hapa, jih che kia, ladang müt cheei hao khonkutila shanga lubü che thüka songdakda.

¹⁰Kho to limbo ngei amaibou kaoa khünbü hapbei, haoen saoposhang ka at long dogo kikei, hoba sangnyua haoenei amaibü kümbü shanga nyen sangkei. Khokei amlang.

¹¹Aieilausi kümsilei amaibü shuokenbü shanga shieikoe panteiko akümnyu kümsilei amaibü kümla müteibü shousi shuong maangpon kaangkosekko yeia.

¹²Shabü müt cheei kümsilei amaibü saongao penko kümbo hao salanga tegükei, lausikei ngei maisho ngekei khei Mühghaü to souhatbü shuong aoyouei hao to soumo hatda, haoen maiphang.

¹³Lausikei amaibü shuong shanga seklabü ayingsi haoeibü salang mangshoubü che tegü ashinglabü aieilausi haoei Mühghaü to ühütda.

¹⁴Kaodaka haüthükbü amlang kümsilei che kia, khei saopobü müt to amaibü kümbü to tegü kühshuokda, tokei müt amaibü to saopobü müteibü kümsilei tegü kühshuokda. Ngei lauda, khei khokei amlang ong.

¹⁵Hibü ngei aukabü kuda, aieilausi müh phanga müt che shauko yungko olinko kilabü to maibou aikei aki; aieilausi kho haoeibü langkei, laobou kaodaka Mühghaüei kukei, kho shanga hao yoa haoei kümbü pendoua kilabü.

¹⁶Ladang songsido ngela hoba kaodaka kümbü kümsilei shuong ditenla shanga ngei maangkukei change nangnak ayep.

¹⁷Kheijinei ngei Mühghaüeibü kümsilei pendou hapbei, khei müh phanga kümbü kümsilei kho mütei lamenla athük, aieilausi ho ditenla mütei latetche haujemlaje jemsikei haoei kho ühüplabü, haü, khüto liko songsido kibü cheei ho ngekei dogo laua tegükei haoei kho alamenlabü.