Read Chang Naga SONGLENDOLEN 9 Bible Online

SONGLENDOLEN 9 - Chang Naga bible

SONGLENDOLEN 9

¹Khübü pendou ngeibü maanga künjinkei, khübü pendou takteiko khei saopobü shuong si hapbü ngebü hoba haoeneibü kümsilei Mühghaüeibü ika kia; ho sanoubü yingkeisi mangsenbü, mütei angekei; haoen thedanga pendou amlangbü ong.

²Pendoueibü thonshang che ong, khei sao- pobü si asaopobü, maibü si amaibü, hinseibü si ihinseibü, lembüsabü kubü si akubü. Theletlanletbü si thelalanla hatbü dan tegütham; müt maibü si shabü müt yoa jetei ong ki.

³Müh phanga kümbü pendoua ho amaibü che ki, khei pendou jungto thu jetei louda; haü, tokei müteibü maangpon amaibüei shenakei, hoba haoen kijinei ngoubüloubü sensimaang haoeneibü maangpona ki, kho phaia haoen haishang to hauda.

⁴Lausikei langkeibü pendou to phenyoan kibou maanglem kia, aieilausi lang kibü kei kho haibü molosaonyu che to khaibou.

⁵Aieilausi langkeibüei haoen hailabü dogo ngekei; lausikei haibüei ai angekei, hoba haoen touje mukei aki; aieilausi haoeneibü damenbü kho maua.

⁶Haoeneibü sanoubü, haoeneibü mangsenbü, hoba dühbü touje maua; hoba mühnyu phanga küman kibüa aineikei haoeneibü phejan hansho ongkei aki.

⁷Hauashi, kaibü shausiyung olinko shauashi, hoba kaibü ih olinbü seneimaangei yungashi, aieilausi Mühghaüei kaibü kümsilei shuong sungletda.

⁸Kaibü neisimei ponpen thupaitham phoshi, hoba kaibü khua onang auko kitishi.

⁹Haoei müh phanga ka la laobou yak kukei, kaibü leshang akibü salang sünga nyi sanoubü yoa olinko kishi; aieilausi mühnyu phanga langkeia hoba ai kümaleia ong nyi kümlaje kho kaibü phejan.

¹⁰Aiong kaibü ikei kümla thüklaje, nyi kümashi, aieilausi no haushang yemsanga kümsilei ayingsi damlabü ayingsi hapbüngebü hoba songsido ai aki.

¹¹Nyibou mühnyu phanga kho ngei hapbei, khei laangyobü kho sobüsepbü shanga aying, lason kho hauki yaangkibü shanga aying, ayingsi shausiyung kho songbüdobü shanga aying ayingsi nyaksinam kho haiyep akbou shanga aying; ayingsi janbümubü kho maangli maangsang shanga aying, lausikei chalou jihsiphai haoen pendou to haüthükda.

¹²Aieilausi mütei haoeibü jihsiphaikei angekei; huonsiyou kibü ngau taka minbü tegü, hoba ausiyuk minbü tegütham mütkei lapda.

¹³Ngei tokei mühnyu phanga songsido tetsida che hapbei hoba kho kü shanga yaangbü che dogo chühenkei.

¹⁴Sangnyu hanbüa müt shisho ong kikei, hoba kho khulimbo Choba yaangbü che loukei hoba komlepbei hoba kho khulimbo lapheishon yaangbü kümbei.

¹⁵Khünei shalebü songsido kibü che kikei, hoba haoeibü songsido danko sangnyu kho khümenkei, lausikei aoeikei kho shalebou kho adamen.

¹⁶Lausikei ngei laukho, “Songsido kho hau tokei maibou, khei yingsikei shalebou songsido kibü kho aweasüngda, hoba haoeibü ngüh aditda.

¹⁷Songbüdobü ngüh hangsho ditbü kho songsido akibü shuong thüka songdakbouei kaang ngekbü tokei maibou.

¹⁸Songsido kho lasona insiaubu tokei maibou lausikei shabü müt cheei maibü juong mautida.”