Read Chang Naga SOLOMON CHIA 1 Bible Online

SOLOMON CHIA 1 - Chang Naga bible

SOLOMON CHIA 1

¹Solomon Chiashuong yoa shanenbü.

²Aiwaü, haoeibü sembung shepbüei haoei kü to sheptimang sühdaü! Aishanga ih toje kaibü sanou maibou!

³Nyi naangbü onang shuonga maibü ponlem che kia. Kaibü nyen onang yeian jinkubü tegü kia; hibü khoei medei shuongei ka to sanouda.

⁴Ngo kaphai to loutishi; sen panteikho, chiaei ngo haoeibü shemjang to leian atakei; ka to khünei olinangko hoba olinyoko kilabü. Ih toje kaibü sanou aei yaangentilabü; haoenei maimaithamei ka to sanouda.

⁵O Jerusalem nouyang shousi shuong; Kedar neichem shuong tegü, Solomon thangtet nei tegü, ngo nakthühbü ki lausikei hemaibü.

⁶Ngo nakthüngan yeibü shanga kü to techüh, aieilausi chanyuei kü to aujiauko juokkei. Künyueibü shousi shuongei kü to khauangko kikei; Haoenei kü la semlüh laak lomtikei; lausikei ngeibü semlüh sekje ngei achüh!

⁷Kü soushouei sanoubou no kü la lenshima. Kaibü sanshuong dan nyi lan lamshautida; chajihboua nyi haoen lan haksotida? Aishanga kaibü jenabou shuong san shuong ngangko shoongaibü che phatko aila ngo kila?

⁸Nyi angelonga, O yaksa yoa hemaisaomainyu, san shuong youmoa paiashi. Hobaje kaibü san shoushou shuong sanlombou neichem shuong nyangko lamshautiashi.

⁹Ngei sanounyu, Faraoeibü tongjina koli saoen che yoa nyi no takteida.

¹⁰Kaibü omlang kho chimenei janetnyu; kaibü ngüm honeibü yakpitei he maietnyu.

¹¹Künei ka la honeibü hele, chandinam jinkuan kümbulabü.

¹²Choba hao jembü Choba setshanga setan kijinei, ngeibü ponlem onangei jembü sanglem hautikei.

¹³Ngei sanounyu kho, langyang sünga ngeibü khukua lengjinei, ponlem onang thungdou che phatkei.

¹⁴Kü la ngei sanounyu kho, Engedi semlüh seka, henna chipen tongbü she che phatkei.

¹⁵Chühashi, no hemaisaomai, ngei sanounyu; chühashi, no hemaisaomai, kaibü nyek dukutuk phatkei.

¹⁶Chühashi, no hemaihaangmai, ngei sanoubou. Oh, lai maangdühlabü che! Setieibü shen sangtüngshoko kia.

¹⁷Setieibü chem phokhüm kho cedar bu ki; setieibü kebung kho busim bu ki.