Read Chang Naga SOLOMON CHIA 2 Bible Online

SOLOMON CHIA 2 - Chang Naga bible

SOLOMON CHIA 2

¹Ngo sharona kibü jakchipen, pholi kaodaka kibü leilang khüpbong chipen che ki.

²Jak shuong yoa leilang khüpbong chipen che phatko, medei shuong yoa ngei sanounyu kho ki.

³Lamang bunyu yoa shongbe long tegü, kho heshou shuong yoa ngeibü sanoubou ki; olinbü yaangbüei ngo haoeibü yeme koubü phanga setkei. Hobaje haoeibü buhek ngeibü sembunga maian kikei.

⁴Haoei ngo lemlibü chem to leian loukei, hoba kü thüka haoeibü nisan sanou kikei.

⁵Semlüh hekeibü wentekei ngo hau kitikei, shongbeei ngo haksotikei; aishanga ngo sanouei semthetda.

⁶Aiwaü, haoeibü nanae ik ngeibü khua aükei yingma; hoba haoeibü mae ikei ngeibü khua hatkubü yingma!

⁷O Jerusalem nouyangnyu shuong, ngei ho pheda khei, hao aloen shongko kanei küsieibü sanou ashiletlabü, dogo yama yaonyu ayingsi meishi saoen nyen phongko theletashi.

⁸Ngei sanouboueibü ngühlang! Chühashi, shongh limbo saiyeiko, shongh shui peiko toman shatko hao louda.

⁹Ngei sanoubou meishi tegü, ayingsi sap paang che tegü ki. Chühashi, khünei küneibü kümthang takpheinei hao loda. Haoei koulom ka chühan hautida; kou khünyet danko haoei hao lolo lenda.

¹⁰Ngo sanoubouei kü to joyoda. Piashi, ngei sanounyu, ngeibü saomainyu, küyoa kaiya.

¹¹Aishanga ditashi, poang dana, langlou thaka;

¹²kaodaka chipen tongda, auei chia laubü jihsiphai louakei; hoba sen kaodaka dukutuk wiyobü ngühlang ditda.

¹³Bhuklonga bhuk hekda, hoba semlüh shuong chipen pungakei; haoenei sanglemhautida. Meimeian kaiya, ngei sanounyu, ngeibü hemaisaomainyu.

¹⁴O ngeibü guduru, laangbob maanga laanglip phanga, kü la kaibü thenyek haptishi, kü la kaibü ngühlang dittikai; aishanga kaibü ngüh teibü hoba kaibü thenyek chühmang sühlabü che ki.

¹⁵Setiei selong shuong, khei semlüh laak leilutibü selong hanbü shuong lapshaikho; aieilausi khübüei chipen bungbü seneibü semlüh laak leilukuda.

¹⁶Ngei sanoubou kho ngeibü, hoba ngo haoeibü. Haoei haoeibü sanshuong leilang khüpbong chipen yoa lamshautida.

¹⁷Ngeyangbü yeisangshou adankhüm shongko; nakthüh adankhüm shongko ngei sanoubou kü jungto kangaia. Hobaje yaüen pholia meishi shoushou che tegü; ayingsi sak paangshou tegü louyoashi.