Read Chang Naga SOLOMON CHIA 3 Bible Online

SOLOMON CHIA 3 - Chang Naga bible

SOLOMON CHIA 3

¹Ngo ngeibü shena yepjinei, langyangbou ngei ngo sanoubou mangha likei; lausikei ngei hao ühüp.

²Ngo tou meimeilabü hoba sangnyu shoongko, khongtanga khongji pheila nongeilabü. Kü soushouei sanoubou hao ngei lamlabü; ngei hao lambei lausikei ngei hao ühüp.

³Lapheibü shuongei haoen sangnyu shoongko haujinei ngo hapbei. Ngei haoen to phekei, “Kü soushouei sanoubou kanei hapakao lo?”

⁴Haoen dansilengko kü soushouei sanoubou hao ngei hapbei. Ngei hao hatlepbei, hoba künyueibü chem to ngei hao aleiba shongko, hoba ngo shia künbü saoeibü shemjang to leian alotshongko, ngei hao aliti.

⁵O Jerusalem nouyangnyu shuong, ngei ho pheda, hao aloen shongko kanei küsieibü sanou ashiletlabü, dogo yama yaonyu ayingsi meishi saoen nyen phongko theletshi.

⁶Wankhük on che phatkotham, ponlem hibü onang hoba jen ponlem hibü namseibü thenaang pendou künan yam lam ka longbü kho ao?

⁷Chühashi, ho Solomon, haoeibü Choba setshanga lengan louada; Israela pendou to shanenbü sepai shuong, khei sekokbü sepai saosem pienan ki.

⁸Haoen pendou in shouan, wapyoa libünyenbü; nangnak hatbümokbüei mütpem weko jembü pheloa in shouan kikei.

⁹Solomon Chobaei jembü lolo Lebanon buei shen kümbei.

¹⁰Haoei khoeibü khamthung chandinamei kümbei. Kho phaia honei kho setshang nakthüngan kibüei kümbei, kho maangaenei Jerusalem nouyangnyu shuongei lemangsühlabü che kümbei.

¹¹Meimeijung hauashi, O Zion nouyangnyu shuong, hoba hao chemkanbü chaloua hao maangpon olinko kibü chaloua haonyuei hao la hankubü Choba khun hanan kibü Solomon Choba to chühashi.