Read Chang Naga SOLOMON CHIA 4 Bible Online

SOLOMON CHIA 4 - Chang Naga bible

SOLOMON CHIA 4

¹No lai hemaikei, ngei sanounyu, oh lai hesisao maikei! Kathangbou phainei kaibü nyek guduru phatko kia; kaibü khulou Gilead shongh ka longbü lon shuong tegü kia.

²Kaibü hauh sanshuong wi kipan mangyushang ka longbüyam phatko kia; haoen wekoei shoushou nyibang; hoba haoen yoa che ongkei angkongbü ayokei.

³Kaibü sembungkhop leiphe saklangbü tegü, hoba kaibü joyolauyo paplepsele ki. Kaibü omlang kaibü neikhui maanga chilang paknyinbü phatkei.

⁴Kaibü ngüm kho Dawideibü laphei laangshong phatkei, yakpit hajar juong yoa pemsemtham hoba lenglengtham; laonei lakjaibü shuongeibü aih shuong anan phoda, kho maimai ki.

⁵Kaibü sen penyi kho leilang khüpbong yoa lamshaubü, penyi phukan shatbü meishi saoen phatko ki.

⁶Chalou alema shongko hoba nakthüh asatshongko, ponlem hibü jen kibü shongh to, hoba ponlem kibü shonghshou to ngo thünglabü.

⁷No hemaisaomai, ngei sanounyu; ka to aikei chühenlabü mak amaibü akakkei!

⁸Kü yoa Lebanon Shongh ka kaiya, ngeibü chemkannyu. Kü yoa Lebanon ka Amana Shongh khu ka, Senir si Hermon khu ka, molosaonyu laangbob ka, kongkhü shongh ka chühashi.

⁹Nyi ngeibü maangpon solangkei hoba ngo maang kaangtikei, nashounyu, ngeibü chemkannyu; kaibü nyekei che chühan litibüei, kaibü ngüm che sepeibüei, nyi ngeibü maangpon kaangtikei.

¹⁰Kaibü sanou lai maikei, nashounyu, ngeibü chemkannyu! Ih toje kaibü sanou latetche maibou! Hobaje ponlem phang pendou toje kaibü onang sanglem latetche maikei!

¹¹O ngeibü chemkannyu, kaibü sembung ka naodei hap tegü teibü atda; naodei si sendei kaibü lishanga thonakei; hoba kaibü neisimei sanglem kho Lebanon sanglem tegü kia.

¹²Nashounyu, ngeibü chemkannyu, lethetan kibü bamang che kia, thangtetan kibü deikhün che, küplepan kibü deikük.

¹³Kaaka longbü chilang hek, bamang buhek deihek maibü; henna ponlem hibü bunyu shuong.

¹⁴Ponlem hilabü hoba khangbü nyak, naanglabü nai hoba bunai, bu yoa ponlem hilabü; jen hoba khühkhühbü nai, kongnyu ponlem pendou.

¹⁵No deikük bamang che, langkeibü deikhün che, hoba Lebanon ka koubü dei ki.

¹⁶Piashi, O yungthang yei; hoba souashi, no yungkük yei; ngeibü bamang thüka haoeibü ponlem longtikei! Kü thangbou haoeibü bamang to lottiashi, hoba haoeibü buhek maibü shautiashi.