Read Chang Naga SOLOMON CHIA 5 Bible Online

SOLOMON CHIA 5 - Chang Naga bible

SOLOMON CHIA 5

¹Ngo ngeibü bamang to lotakei, nousina, ngeibü chemkannyu. Ngei ngeibü ponlem hibü hoba balsam ponlem yoshaiakei; ngei ngeibü naodei, naodei khüh yoa shaua; ngei ngeibü ih sendei yoa yunga. O thangbou shuong, shauashi, yungashi, haü, sanouei ajaakshongko yungashi!

²Ngo yepbei, lausikei ngeibü maangponje pietlemetnyu kikei. Chühashi, ngo sanoubouei koukapa kuokeiko mangh likei. Kü la ipbuashi, nousina, ngei sanounyu; ngeibü guduru, ngeibü bennyu sounyu. Aishanga ninei ngeibü khu nemakei. Ngeibü khu nangnakbü deihakei nemakei.

³Ngei ngeibü mangyuk hangleda, ngei kho lai yukngaila? Ngei ngeibü you saka, ngei khübü kho lai mak kaktila?

⁴Ngei sanoubouei ik kou khünyet to phekattikei, hoba kü maangpon maang aenei laakko kikei.

⁵Ngei sanoubou la ipbula ngo pikei, hoba ngeibü ik ponlem hibü saangan apbo naanglepan, hoba ngeibü ikjishou ponlem hibü dei koukhinjina saangkei.

⁶Ngei ngeibü sanoubou la ipbukei, lausikei ngei sanoubouje ngaian kikei, haoei joyojinei ngeibü soushou semjung haukei. Ngei hao lambei, lausikei ngei hao ühüp, ngei hao ngakei, lausikei haoei ajongai.

⁷Sanglombü shuong sangnyu pheiko haubü shuongei ngo hapbei, haoenei kü to ngümbei, haoenei kü la ngüman aktikei; kümthang lombü shuongei ngeibü neisimei sunglangkei.

⁸O Jerusalem nouyangnyu shuong, ngei kan la sakkuda, kanei ngei sanoubou hapalonga, kanei hao to ngo sanouei shatda dogo lenkushi.

⁹O yaksa yoa hemai saomainyu, Nyi kü la hai sakkulabü lele lubü to latetche aeikei? Nyi sanoubü lubü sanoubou to aian ai aeibou ki?

¹⁰Ngei sanoubouje hajar an yoakei shetenbou, lanthükbou hoba pendou yambou ki.

¹¹Haoeibü khu hon maibou tham ki; haoeibü khulou aukhomakmak tegü nakhütham wi shangtüngtham ki.

¹²Haoeibü nyek shumang nyangko kibü guduru shuong phatko, sendeiei mangyuan paplepshoule tentian ki.

¹³Haoeibü omlang sanglem longbü balsam chipen tegü kia; haoeibü sembung khop leilang khübong chipen tegü, ponlem hiko yanletbü phatko ki.

¹⁴Haoeibü ik shuong saa angko namseklaang tenan phobü hon ikjikhap tegü ki; haoeibü mang safir namseklaang jinbü thunyu hauhei kümbü tegü ki;

¹⁵Haoeibü you shuong ninulaang thaonyu hon maibü haüyetbü to lonettibü tegü ki.

¹⁶Haoeibü sembungkei jankei janetshouko; haü, hao pendoua maisapbei. Ho ngei sanoubou ki, hoba ho küthangbou ki, O Jerusalem nouyangshou shuong.