Read Chang Naga SOLOMON CHIA 6 Bible Online

SOLOMON CHIA 6 - Chang Naga bible

SOLOMON CHIA 6

¹Ngei sanoubou lato satan apbei, O no yaksa yoa hemai saomainyu? Ka yoa hao lamla sen haulabü lele nyi sanoubou laeto sepeinyu satkei?

²Ngei sanoubou haoeibü bamang to sanglem hishang to, bamanga lamshautila hoba leilang khüpbong chipen pakla yanakei.

³Ngo ngo sanouboueibü hoba ngo sanoubou ngeibü. Haoei haoeibü sanshuong leilang khüpbong chipen yoa lamshautida.

⁴O ngei sanounyu, no Tirza tegü hemaisaomai, Jerusalem tegü mainyu. Nisan jungbü sepai tan tegü hatla moklabü.

⁵Kü ka kaibü nyek sepeinyu apashi; aishanga haoenei ngo naklepda. Kaibü khulou lonshuong dan che, Gilead shongh ka louyenbü phatko ki.

⁶Kaibü hauh sanshuong mangyushang ka longbüyam phatko kia; haoen wekoei shoushou nyibang, hoba haoen yoa che ongkei angkongbü ayokei.

⁷Kaibü omlang kaibü neikhui maanga chilang paknyinbü phatkei.

⁸Chobasao saosem, hoba thangnyu saolei, hoba medei aweenko ki.

⁹Ngeibü guduru, ngeibü bennyu sounyu che ong kia; haonyueibü shou sao ong, sao buknyu bennyu kho sao ong ki. Nouyangnyu shuongei sao hapbei hoba sao to haünyu dogo laukei; Haü, Chobasao shuong hoba thangnyu shuongei hoba haoenei sao sangkei.

¹⁰Ngeyang tegü chühan litibü; litnyu tegü hemaisaomai chanyu tegü sakteingesakbü, nisan jungbü sepai tan che phatko hatla moklabü ho ao?

¹¹Yomanga momtham kibü semlüh tongda si atongda chühla. Chilang chipen bungda si abungda chühla, ngo buhek bamang lamjung yankei.

¹²Ayingsi ngei angeko kijinei, ngeibü soushouei ngei maangangbü kü mütlieibü tongjin yoa ngo phokukei.

¹³Sepeiashi, sepeiashi, O Shulambü. Künei ka to chühlabü lele sepeiashi, sepeiashi. Mahanaimbü tombülakbü to chühbü tegü, aila kanei Shulambü to chühla?