Read Chang Naga SOLOMON CHIA 8 Bible Online

SOLOMON CHIA 8 - Chang Naga bible

SOLOMON CHIA 8

¹O, no kho kü nyuei senyopbü, ngeibü jaisina tegü yinga tegüje! Ngei no khongaenei hapjinei, ngei ka to sembung shepoulabü; haü, aoeikei kü la anyikuko kikhoulabü.

²Ngei no leian haukhoulabü hoba no künyu chem to leibakhoulabü. Saoei kü la song lenkhoulabü; ngei ka la ngeibü chilang hek ponlem hibü ih yungtikhoulabü.

³Haoeibü nanae ik ngeibü khu phanga kikhoulabü; hoba haoeibü mae ikei kü to himyolabü.

⁴O Jerusalem nouyangnyu shuong, ngei ho pheda, Kanei küsieibü sanou ashiletlabü dogo theletashi.

⁵Haoei sanoubou to nongan yam ka longshedbou ho ao? Shongbe long phanga ngei no pitikei; khünei kanyuei no bukkei, laonei sao no bukla nabuk shatei shatko kikei.

⁶Kaibü maangpona shangjinbü tegütham, kaibü phema shangjinbü maimai ngo thüngtiashi. Aishanga sanoubü kho haibü tegütham hau kia; nyekto shatbü kho hee tegü onou aki. Hoei wanlühei tegütham khitda, hoba maangshat wanlongei maimai londa.

⁷Dei juongei sanou ajonyeten, ayingsi yungsenei kho nyemla athük. Müt cheei sanou jekla jembü nyaksinam khümbo kuasikei, hao la ong aei nyikulabü.

⁸Küneibü na nashounyu che kia, hoba sao la sen aki. Sao chemdang yeila phebü chaloua, künei sao shanga ai kümla?

⁹Sao kümthang che tegüje, künei sao thüka chandinam chem dangyokhoulabü. Hobaje sao koukap che tegüje, künei cedar bu shenpheiei thünglepbhoulabü.

¹⁰Ngo kümthang che ki, hoba ngeibü sen khoeibü lapheishon shuong phatko kia. Ngo sanoubou thea ngo hakso hapnyu che tegü ki.

¹¹Baal Hamona Solomonei semlüh laak che ki. Lombou shuongla hao sek kho kukei; mütpem wekoei buhek shanga chandinam hajar chebang sungbalabü kikei.

¹²Ngeibü semlüh sek, laobou ngeibü ki, kü junga kia; O Solomon, hajarei lela thükkei; hoba aoyouei buhek lomda khübü kho soan lelabü.

¹³No bamanga kibou, himshuongei kaibü ngühlang ditda; kho kü la dittiashi.

¹⁴Panteiashi, ngei sanoubou, hoba ponlem hibü shongh thüka no meishi nyuyaang che, ayingsi yao shoushou che phatko kilabü.