Read Chang Naga ISAIA 1 Bible Online

ISAIA 1 - Chang Naga bible

ISAIA 1

¹Uzzia, Jotham, Ahaz hoba Hezekia, Jihudabü Choba shuong haanga, Amozeibü shou Isaia, haoei Jihuda si Jerusalem shanga mangsang hapbü.

²Ditashi, O mühshuong, nou haangashi, O kaodak! aishanga BUNYUBOUei joyoa: “Ngei shousi shuong pangteienkei hoba chingen minentikei; lausikei haoenei ngo khulimbo meimeikei.

³Masu pongsuei jembü bunyu ngekei, hoba gaduei jembü bunyubou chem ngekei; lausikei Israeleije ngo angekei, kü mütliei aditenda.”

⁴Shabü phang, shabü on künan kibü mütli, kümsilei amaibü kümbü lilabü, leilubü jungeibü shousishuong! Haoenei BUNYUBOU inleda, haoenei Israeleibü Saopobou awealau; haoen maangpon bangan phaito sukngailanga.

⁵Kan to ngümlabü lele toukei aila kanei aei aei khulimbo meimeila? Khu khümbo to shatda, hoba maangpon pendou yuida.

⁶You youdem maang aeka khu sühko maian aki, moukhün, yingko ngümbü, hoba sii koubü mou ong, khübü kho aküplep, ayingsi khühkei akhüh, hoba onangei amaiti.

⁷Kaneibü kaodak sangle phanga kia. Kaneibü sangnyu shuong wanei lonakei, kaneibü kaodak kan thedanga küksithangei suian aplabü hoba küksithang shuong nangan apbü tegü kho sangliphang la yeia.

⁸Hobaje semlüh seka dipshou tegü, simou seka bangdip tegü, komlepan kibü sangnyu tegü, Zion nouyangshou apyoakei.

⁹Hobaje lakjaibou BUNYUBOUei sen shanga shisho ongkei jouan aphoku tegüje sen Sodom tegü yeian kikhoulabü, sen Gomora tegü yeian kikhoulabü.

¹⁰Kan Sodom songdakbü shuong, BUNYUBOU ngüh ditashi, kan Gomorabü BUNYUBOUei lenbü ngüha nou haangashi.

¹¹“Kü shanga kaneibü lembü khüjoche ainei lela?” dogo BUNYUBOUei lauda. Sanlon paang juokbü lembüei, hoba amenbü shatsinam haabüei ngo shenko kia, hoba ngei masu pongsu, sanlon shoushou, ayingsi lonpaang siia aolinda.

¹²Kan kü thedang to loujinei, ngeibü chemso nakeila, ho kan ka aoei hikei?

¹³Touje amlangbü lembü tejung, ponlem hibü kü shanga mangsenlabü ki; litnyu haanbü hoba Nounyet, thangyen ngashaibü, shabü hoba saopobü thangyen ngei chühko akien.

¹⁴Kaneibü litnyu haanbü hoba lemsilang kü soushouei mangsenda; kü shanga khübü kho khonsaklabü ki, khübü khoei ngo oanjaakan apa.

¹⁵“Hibü ladang kanei ik tuoklaje, ngei ngeibü nyek kan ka huan aplabü; kanei annepenko welausikei ngei aditlabü. Kaneibü ik siiei shenakei.

¹⁶Kan sakan apashi, kan hinseian kishi, kü the ka kanei amaibü kümbü apashi, amaibü kümbü nangashi.

¹⁷“Maibü kümla ditletashi, ngühmai jungeiashi, shieikoebü thangetashi, bou akibü la pü lekuashi, latnyu shanga ngühmai matjem laukushi.”

¹⁸“Tou kaiya, hoba sen pendouei liko damanchühkho,” dogo BUNYUBOUei lauda, “Kaneibü shabü jajinko saklangasikei khübü kho ninthu tegü thupaitikulabü, sii tegü saklangasikei, khübü kho wi tegü thupaitham yeitikulabü.

¹⁹“Kanei hehoat kiko hoba ngüha lealonga, kanei kaonyudak ka maibü shaulabü.

²⁰Lausikei kanei ühsap dogo khulimbo meimeialonga inei kan suilabü, aishanga BUNYUBOU sembungei kho laua.”

²¹Maanglembü sangnyu lai küman asangalan sao yeikei! Sao ngühmaiei shenan kikei, saopobü kishang sao to kikei, lausikei touje müt haitibü yeikei.

²²Kaibü chandinam namphet la yeiakei, kaibü ih dei to kheiyoan apa.

²³Kaibü songdakbü shuong khulimbo lobü shuong yeia, hoba kokbü shuongeibü jenabou yeia; müt- pem wekoei besa anyem sanouda, hoba ku phai semda; haoenei bou akibüeibü mat ajembuda, ayingsi haoen jungto loubü latnyu shanga ngühmaanglanbü akümda.

²⁴Hibü lakjaibou BUNYUBOU, Israel Thükenbou BUNYUBOUei lauda, “Ngei ngeibü dangbou shuong thüka maangshat sotilabü, hoba ngei ngeibü dangbou shuong to phoklamlabü.

²⁵Ngei kakhu limbo ngeibü ik sepeilabü, hoba kaibü namphet kaibü hokjunga tühnyintikulabü, hoba kaibü kheiyobü pendou hinseitikulabü, hoba kaibü namkung pendou sunglanglabü.

²⁶Shaangla tegütham ngei kaibü songdakbü shuong hoba shaangla tegütham kaibü damanchühlabü kümetkulabü; phaila ka to Saopobü sangnyu, Maanglemenbü sangnyu dogo ngalabü.”

²⁷Ngühmaiei Zion angthetlabü, hoba sao maangpon sepeibü shuong saopobüei khümenlabü.

²⁸Lausikei ngühkhüm leilubü shuong hoba shabü shuong shanga liko maulabü kilabü hoba aoyouei BUNYUBOU inletkei haoen maulabü.

²⁹Aishanga kanei maangdühbü yembü bulong shanga kan himoulabü, hoba kanei pienbü bamang shanga kan phenyembo kilabü.

³⁰Aishanga yik sembü yembü tegü, hoba dei akibü bamang tegü kan kilabü.

³¹Kheijinei hauki yaangkibü mütshuongkei jiklabü bu tegü, hoba haoeibü kümsilei wanang phatko kilabü; hoba ham liko lonlabü, hoba kho aoeikei anyettienlabü.