Read Chang Naga ISAIA 10 Bible Online

ISAIA 10 - Chang Naga bible

ISAIA 10

¹Aoyouei latnyu shuong kho haoenei soletbü peisilei che yeitida, hoba bou akibü shuong haoeneibü la yeitida, athükaminbü shuong ngühmai matjem ka sepeitida, hoba kü mütli shalebü ka shauko kibü sungngaila shanga,

²asaopobü ngühkhüm shuong kümda, hoba dobou shuong aoyouei ngean ayingbü doda, haoen shanga ügütü!

³Matjembü chaloua saabü ka loula kibü yeinak ka nyi ai kümenla? Ao jungto thuibü shanga satenla, hoba kaibü nyaksinam nyi lan phokula?

⁴Thükbou shuong phang to kan khüpjung yanlabü, haitibü phangaenei kan tuonglabü. Ho pendou shanga hao khauang angailang, lausikei toukei haoeibü ik tuokan kia.

⁵Aha! Assiria ngeibü khauangbü ju, hoba ngo maangpokbü phodong!

⁶Mühghaü to ühütbü phang, ngo khauang maangpok kibü mütli khulimbo ngei hao hautikei, hoba haoen ka soshau soyungla hoba peisilei hausheila hoba khonga thim tegü nakan attila hao la ngei sakkulabü.

⁷Lausikei haoei kho tegü adamda hoba haoei kho tegü haoeibü maangpona daman achühda; hoba phang shisho ong ayingko wapan apbula ong damda.

⁸Aishanga haoei laukei, “Ngeibü lajamleibü shuong haoen pendou Choba shuong aying lo?

⁹Karkhemish tegü Kalno aki lo? Arpad tegü Hamat aki lo? Damaska tegü Samaria aki lo?

¹⁰Jerusalem si Samariabü touje khaibou heangsho kümbü noksa khei kü ikei heangsho shuong sangle lamensije,

¹¹ngei Samaria si heangsho shuong to kümbü tegü ngei Jerusalem si haoeibü heangsho shuong to akümlep lo?”

¹²Lausikei ladang BUNYUBOUei Zion shongha hoba Jerusalema haoeibü kümsilei kümsemlaje, haoei hai laulabü, “Ngei Jerusalem Choba yonglamliliko maangpon yaangbü, hoba haoeibü amlangbü soneikangbü shieikoelabü.”

¹³Aishanga haoei laukei, “Ngeibü ik hauei ngei ho kümbei, hoba ngeibü songeihonei; aishanga kü to ditenbü kia, ngei ngeibü phangshuongeibü leilang sungngaia. Hobaje ngei haoeneibü thanshang soan sunga; phangshuong ngei kao sühko senleda.

¹⁴Phangshuongeibü nyaksinam aueibü hap tegü ngei leilutikua; hoba tonjung satan kibü autei hejung loubü tegütham ngei kaodak pendou yoshaia; hoba kaak topeibü, ayingsi lemenyobü ayingsi sembung ipbü che ongkei akiteilabü.”

¹⁵Lausikei BUNYUBOUei lauda, “Mütei bu shenbü wouei jembü lolo hao jungbou thüka lilila thükkei lo? Ayingsi bulatei aoei bu latda hao thüka jembü lolo yaangenlep lo? Namju aoei tonenda hao topeitibü tegü, ayingsi phodongei ao bu aying hao topeitilabü tegü kho khei yinglabü.”

¹⁶Hibü BUNYUBOU, Thükenbou BUNYUBOUei haoeibü netthembü shuong jungto koplinlabü shatlim hautikulabü, hoba haoeibü soneikangbü jeiko wan longbü tegü wan kühan jinkulabü.

¹⁷Israel Ngesakbü wan la yeilabü, hoba haoeibü Saopobou kho wanlüh la yeilabü, hoba khoei haoeibü jak hoba jaklong nyetchenei ong juoklabü hoba suilabü.

¹⁸Hobaje haoei yamkabü soneikangbü hoba hek hekkubü khongthu, soushou si mang ham haoei mautikulabü; hoba kho shatbü müt pheijung ngaibü tegü kilabü.

¹⁹Hobaje haoeibü yamkabü bunyu shuong jouan kibü kho nashou cheei ongkei tonan phoenlabü lele shisho ong kilabü.

²⁰Kho chaloua jouan kibü Israel hoba satenbü Jakob chemdangei touje haoen yoa wapyobü dangbou labou to nongan akilabü, lausikei BUNYUBOU, Israel Saopobou to maimaithamei nonglabü.

²¹Hau yaangbü Mühghaü jungto joubü cheje, khei Jakob joubü, sepeinyu longeilabü.

²²Aishanga kaibü mütli molo phetsen tegü kiasikei haoen yoa joubü ong longeilabü; saopobüei sopbo mautila janletkuakei.

²³Aieilausi BUNYUBOU, Thükenbou BUNYUBOUei maula janletkuan kibü kho kaonyu pendou thüka kümlabü.

²⁴Hibü BUNYUBOU, Thükenbou BUNYUBOUei laukei, “O kü mütli Ziona kibü shuong, Ijepbüei kümbü tegü Assiriabüei ka to namjuei ngümsikei Assiriabü to tehüt!

²⁵Aishanga tuishoa ngo maangto shatbü nanglabü hoba ngo khauangbü koulabü.

²⁶Kheijinei Thükenbou BUNYUBOUei Assiria khulimbo Midianbü Oreb laang nyangko haitibü tegütham semlabü shanga tonan jinkulabü; hoba Ijep thük to haoei tonbü tegütham haoeibü ju yungnyu thüka tonlabü.

²⁷Hobaje kho chaloua haoeibü on kaibü phak ka tonletlabü, hoba onang naangkubüei buleng kho mautikulabü.”

²⁸Haoen Aiat to loua; haoen Migron peithetjung dana. Mikhmasa haoenei haoeneibü on künlean phoakei.

²⁹Haoen lam danjung hauakei. Gebaa haoen shaiakei. Rama lühda, Sauleibü Gibea satjung hauakei.

³⁰Ngüh yaangbüei ngekashi, O Gallim nouyangnyu! Ditashi, O Laisha! Jongaiashi, O no Anathot!

³¹Madmena hatla satda, Gebim müt satenshang lambo satda.

³²Tattham hao Noba otlabü, haoei Jerusalem shongh, Zion nouyangshou shongha haoeibü ik nyatlepbü ik kho topeilabü.

³³Lausikei chühashi, BUNYUBOU, Thükenbou BUNYUBOUei bhek hatlamoklabü che wapan aplabü; hoba loubang kibü chengan koutilabü hoba kuia kibü phangto louyantilabü.

³⁴Hobaje namei ha- oei yam shangbü waplabü, hoba Lebanon kaangkosekko tuonglabü.