Read Chang Naga ISAIA 11 Bible Online

ISAIA 11 - Chang Naga bible

ISAIA 11

¹Hobaje Jesse mangka shaangbü shou che longlabü hoba haoeibü li ka bhek cheei lang heklabü.

²Hobaje hao thüka BUNYUBOU Soushou songsido hoba ditenbü kibü soushou, damanchühbü hoba hau kibü soushou hoba hapbüngebü soushou hoba BUNYUBOU to hatbü kilabü.

³Hobaje BUNYUBOU to hatbüa olinbü kilabü. Haoeibü nyekei hapbü haoei mat ajemlabü hoba haoeibü nouei ditbüei ajanenlabü;

⁴lausikei ngühmaiei haoei shalebü matjemlabü, hoba kaonyeka sembüambü shanga eaaoa janenlabü hoba haoeibü sembung juei haoei kaodak to ngümlabü, hoba sembungkhop hakei haoei amaibü haitilabü.

⁵Haoeibü shembenei kho saopobü kilabü, hoba haoeibü kaangnei kho maanglemenbü kilabü.

⁶Kheijinei sho san shoushou yoa kilabü, hoba kongkhüei lon shoushou yoa lenglabü. Masu shoushou si molosaonyu shoushou hoba amenbü shatsinam chela lamshaulabü, hoba nashou hanbü cheei haoen leiyeilabü.

⁷Masu si sap liko lamshaulabü, hoba haoeneibü shoushou shuong liko chela yeplabü. Molosaonyuei masuei tegü youho nyailabü.

⁸Senyungbü nashou pinyueibü laangkhüna louyolabü, hoba nashouei haoeibü ikei pinyu hap phekeilabü.

⁹Ngeibü saopobü shanga pendoua haoenei ai aleilutilabü, ayingsi amautilabü. Aishanga deiei yungnyu küplepbü tegü, BUNYUBOU songeidoei kaonyu shenlabü.

¹⁰Kho chaloua ho haüthüklabü, khei Jesseeibü lilabü laobou mütshuong shanga tetsida ki, phangshuongei hao jungto lamjung haulabü, hoba haoeibü haksoshang khünei soneikangbü kilabü.

¹¹Kho chaloua Assiria ka, Ijep ka, Pathrus ka, Kush ka, Elam ka, Shinar ka, Hamat ka, hoba yungnyu yungko kaonyek ka BUNYUBOUei jembü ikei nyibou joubü jembü mütli laobou jouan kilaje kho sungbalabü.

¹²Phangshuong la jembü shensinge kulabü hoba nangletan kibü Israelbü yoshailabü hoba kaodak kaonyek lei ka Jihudabü phinnyinan kibü liko kamshailabü.

¹³Kheijinei Efraim khulimbo nyekto shatbü touje thonan aplabü, hoba aoyou Jihudabü khulimbü yeian ki haoen wapan aplabü; Efraimei Jihuda to nyekto ashatlabü; hoba Jihudaei Efraim khulimbo ayinglabü.

¹⁴Lausikei haoenei chanep Filistiabü phak thüka pijung yanlabü, haoenei liko chaangbou aenei kibü shousi shuong soan sunglabü. Edom si Moab haoeneibü hau phanga kitilabü, hoba Ammon shousi shuongei haoen to ngüha lelabü.

¹⁵Kheijinei BUNYUBOUei Ijep yungnyu lishang utilabü. Hobaje haoei yei aubüei shumang thüktou haoeibü ik topeilabü, hoba kho shushou nyet la yeian aptilabü, hoba mütshuong ngok anembo paijung hautilabü.

¹⁶Hobaje jouletbü jembü mütli laobou joulaje, haoen shanga Israel shanga hao Ijep kaonyek ka longbü chaloua kibü tegü Assiria ka lamkhong che kilabü.