Read Chang Naga ISAIA 13 Bible Online

ISAIA 13 - Chang Naga bible

ISAIA 13

¹Amozeibü shou Isaiaei Babilon shanga onat hapbei.

²Kanei shongh khongthua tetsida che phoashi, haoen to ngüh yaangbüei ngaashi, hoba yaangenbü shuong bakhün to atla ikei küpashi!

³Aishanga ngeibü khauang ik shatla shanga khümbo saüenbü hoba lakjaibü mütshuong ngei ngashaia.

⁴Müt tan yaangbü ngühlang phatko shongha lemenbü ditshi! Phangshuong Choba sanglea yoshaian huibü ngühlang ditashi! Thükenbou BUNYUBOUei lason shanga lakbühongbü shuong yoshaitida.

⁵Kaodak saabü mühthon kaothon ka haoen louada, ho kaodak khümbo maulabü BUNYUBOU hoba hao khauang longbü insiaubu ki.

⁶Kanei manghaapashi, aishanga BUNYUBOU chalou nyangko kia, hoba pendou Thükenbou ka maulabü loulabü.

⁷Hibü ik pendou hau akiko yeilabü, hoba mütpem weko maang akiko yeilabü, hoba haoen phenyemlabü.

⁸Maang yuibü hoba maangshatei haoen to sühlabü, yaksa na hapjinei khonkubü tegü haoen khonkua kilabü, haoen cheei che to maangpangbüei nyeklang menmentham chühlabü; haoeneibü thenyek kho wanlong tegü kilabü.

⁹Chühashi kaodak litham apyokulabü, hoba ho ka shabü shuong mautikulabü onou aki; maang- pokbü hoba kaangbüsekbü khauang longbüei BUNYUBOU chalou louada.

¹⁰Aishanga müha khanshoulitshou shuong hoba onshaian kibü khanshoulitshou shuongei ngesakbü akulabü; ladang chanyu longlaje hao nakthühtham yeilabü, hoba litnyuei ngesakbü ohaulabü.

¹¹Amaibü kibü shanga kaodak hoba müt amaibou haoenei shed shonbü shanga ngei shieikoelabü; lilibü pejapelabü ngei thontikulabü, tokbü sungbü yonglamlilibü phangto yantikulabü.

¹²Hon maibou toje müt ong hoba ofir hon toje khunak shousi hapla sekbou ngei yeitikulabü.

¹³Hibü Thükenbou BUNYUBOU maangshat danko, hao kaangbü sekbü khauang longbü chaloua mütshuong lühlabü hoba kaodak jembü kishang kao nyaakeikulabü.

¹⁴Kho phaiya meishibü shuongei shieibü meishi phatko ayingsi leisheilabü akibü sanshuong phatko haoen mütpem weko jembü mütli jungto sepeinyu ngailabü, hoba mütpem weko jembü kaodak to satlabü.

¹⁵Aoyou pailaje baiko suettilabü hoba lapjung loubü mütpem weko inei wapettilabü.

¹⁶Haoeneibü nasakshou shuong haoen thedanga netla yeiko ngümnyinkulabü, haoeneibü chem aaklangkulabü, hoba haoeneibü yaksi shuong to ik shatlabü.

¹⁷Chühashi, ngei haoen khulimbo chandinam shanga weko akibü hoba hon to olinbü akibü Mediabü pühnyintilabü.

¹⁸Haoeneibü laujinei heshou shuong netlaphoula yeiko kipetkulabü, hoba nasetshang hek thüka haoenei onou ühüplabü, ayingsi nashousi shuong haoenei sanouko achühlabü.

¹⁹Hobaje Mühghaüei Sodom si Gomora mautijinei tegü Choba sangle hemaihaangmai Khaldibü yonglambü soneikangbü Babilon kho tegü yeilabü.

²⁰Touje hao to ladangkei sang asangngailabü, ayingsi meten meten müt akilabü. Arabbü aoeikei khünei neichem adanglabü, sanlombü aoeikei khünei san ayeptilabü.

²¹Lausikei phetsen kaodak yamkabü meisiau khünei yeplabü, hoba chemshuong kho ngühyoko kibü meisiau shuongei shenan kilabü; khünei ostrik aushuongei shenan kilabü, hoba yao shuong khünei saiyeilabü.

²²Hobaje haoeneibü laangchema sho, hoba Chobaeibü chem maibüa selong shuong lemenlabü; kho jihsiphai lousühda, hoba kho chalou kho asünglanglabü.