Read Chang Naga ISAIA 14 Bible Online

ISAIA 14 - Chang Naga bible

ISAIA 14

¹BUNYUBOUei Jakob to üeisanou kilabü, hoba nyiboula Israel pienlabü hoba haoen jembü kaodaka phokulabü, hoba küksithang shuongei haoen to penan kilabü, hoba haoenei Jakob chemdang tou bou laman kilabü.

²Hobaje phangshuongei haoen leian haoen kishang to loulabü, hoba Israel chemdangei haoeneibü BUNYUBOUeibü kaodaka khangenbou hoba khangennyu yeitila haoen lelabü, kho tegü haoen shaangla lapbü shuong haoen phanga thüngbou shuong yeitilabü, hoba haoenei haoen khonkutibü shuong thüka songdaklabü.

³Kaibü maangshat hoba laobouei no kümtileitila yeitikei,

⁴Nyi Babilon Choba khulimbo ho nyikubü chia ho nyi sungba hoba laushi, “Shieikoebü lai thonan apbei; ho sangnyu khüai lelabü!

⁵BUNYUBOUei amaibü shuongeibü ju hoba songdakbü shuongeibü julo, laobouei mütshuong to leilubüei athakko ngümbei, hoba aoeikei senetla athükbü khauangei phangshuong thüka songdakkei, kho leilutia

⁷Kaonyu haksoa kia hoba küpjembo kia; haoenei chia lauda.

⁸Haü, busim long si Lebanona cedar bulong shuongei ka to olinda hoba lauda, ‘No tuongan kisije kün khulimbo bu akbü aokei alouda.’

⁹“Phangaeka molowanei ka to haüyola topeida, hoba ka shanga haoei haibü, khei, kaodak kongnyu shuong pendou phühentida; kaodak Choba pendou haoei haoeneibü Choba setshang ka tonenkuda.

¹⁰Haoen pendouei jongaiko ka to laulabü, ‘Kün tegü nokei tou hau akiko yeian apa lo? No kün tegü yeia lo?

¹¹Kaibü kongkin ngühlang hoba kaibü yonglamshamle yemsang sühko senyana; no maangaenei pheyangei omlepakei, yangbemei no küplepakei.’

¹²“Khuthük ka no lai atetan ki, O Lucifer, chalou Khanyang, Ngeyangbü shou! Phangshuong phangae to yantibou, no lai kaoa sühko nakyantian ki!

¹³Hobaje nyi kaibü maangpona, ‘Ngo khuthük to anglabü, Mühghaüeibü khanshoulitshou shuong thükaenei ngei ngeibü Choba setshang tonenlabü, hoba yungthang ae thonbüa ngo shuong yoshaibü shongh thüka ngo setlabü.

¹⁴Ngo sangmei thükto anglabü, ngo Thükkabou phatko kilabü.’

¹⁵Lausikei püngkhün thonbü sühko, yemsang sühko noje leiyanlabü.

¹⁶“Aoyouei no hapda haoenei ka to kaang chühlabü; haoenei kashanga damanchühko laulabü, ‘Kaodak lühtibou hoba Choba sangle shuong nyaakeitibou müt kho ho si?

¹⁷Sangnyu leilutibou hoba kaodak yam la yeitibou müt kho ho si? Thüngbü shuong jembü chem to angaitibou müt kho ho si?’

¹⁸Phangshuong thüka Choba pendou, haoen pendou mütpem weko jembü chema soneikangbüa yepda.

¹⁹Lausikei noje mangsenlabü bubhek che tegü, inei haitibü dan, haibü shuong yoa, you phanga nakeibü haibü mang, laang püngkhün to yanbü tegü, no hea nangletkei.

²⁰No haoen yoa liko akhünlabü, aieilausi nyi kaibü kaonyek leilutikei, hoba nyi ka mütli haitikei. Amaibü kümbü thensilen ponpen shanga telaueiti ma!

²¹Haoeneibü bousi shuongei shed shonbü shanga, haoeneibü shousi shuong longan kaodak juongnyu, kaonyu nyakko sangnyu shuongei shentisi amaibula haoeibü shousi shuong haitishang lamleashi.”

²²“Ngei haoen khulimbo meimeilabü,” dogo Thükenbou BUNYUBOUei lauda, “hoba Babilon ka ngei saoeibü nyen hoba jouletbü shousi hoba thensilen wapan aplabü,” dogo BUNYUBOUei lauda.

²³“Toukei ngei ho san kishang hoba deieibü süngküp la yeitilabü hoba kho ngei leilubü chemkujinei kuan mautilabü,” dogo Thükenbou BUNYUBOUei lauda.

²⁴Thükenbou BUNYUBOUei thekolanko laukei, “Maimaitham ngei dambü tegü kho khei haüthüktilabü, hoba ngei maangangbü tegü kho khei kilabü.

²⁵Khei ngei Assiriabü kü ikei leilutilabü, hoba ngeibü shongh thüka you phanga hao nakeilabü; kheijinei haoeibü buleng haoen ka banglabü, hoba haoeneibü phak ka haoeneibü on banglabü.

²⁶Kaonyu khümbo shanga kho ngei kümlabü maangangbü lamthen ki, hoba phang pendou thüka tuokbü ik kho ho ki.

²⁷Aishanga Thükenbou BUNYUBOUei kümla maangangena, hoba kho aoei leilutila? Hobaje haoeibü ik shingakei, hoba kho aoei sepeian shiletla?”

²⁸Ho thusei ngüh Ahaz Choba haibü poa kikei.

²⁹“O Filistia, kan tou ngümbü ju leilua, kan pendou tüolinyo; aishanga pinyueibü li ka piyang che longlabü hoba haoeibü hek kho wan tegü pijung haubü pinyu yinglabü.

³⁰Hobaje shalebou thamei shausiyung haplabü, hoba khambü shuong thushed akiko leketnyu kilabü, lausikei kaibü li je ngei mühsinouei haitilabü, hoba kaibü jouletbü ngei haitilabü.

³¹Haapyoashi, O bakhün; ngekyoashi, O sangnyu; no hatbüei tühnyina, O Filistia, kan pendou! Aishanga yungthang aeka wankhük che louada, hoba haoei pienbü chaloua aokei sukjung ngaian aloda.”

³²Kholonga phangeibü ngühlang künbou la ai ong jongaibü kula? “BUNYUBOUei Zion küma hoba hao to hao müt khonsakbü shuong satenlabü.”