Read Chang Naga ISAIA 15 Bible Online

ISAIA 15 - Chang Naga bible

ISAIA 15

¹Moab shangabü thusei ngüh che. Aishanga Moaba Ar youche langyanga leilua, hoba kongkong yeitia; aishanga Moaba Kir youche langyanga leilua, hoba kongkong yeitia.

²Haoen Dibon to hoba lemshang shonghkhu to haapla angkei; Moabei Nebo si Medeba thükto lapangda; haoeneibü khu pendou kütan apa, hoba sembung wi pendou kütan apa.

³Haoenei khonga haoen lolo senouneiei shembe kaida; haoen chemdaka hoba haoeneibü khonga mütpem wekoei nyeksi angko haapda.

⁴Heshbon si Elealeei ngekkei hoba haoeneibü langh Jahaz sühko ditkei; khoei Moabbü insiaubu jungbü shuongei ngüh yaangbüei ngekkei; haoeibü soushou lühda.

⁵Kü maangponei Moab shanga haapda; haoeibü yaangenbü shuong Zoar hoba Eglath Shelishiya aeto satjung hauda. Aishanga haoen haapbo Lohit to angda; aieilausi Horonaim lama haoenei leilubü ngühei ngekkei.

⁶Aishanga Nimrim dei ulangtham apa; aieilausi sang linakei; nyem haanbü alongda; khünei sangtüngbü peisilei ai aki.

⁷Hibü haoenei juong pailetbü hoba haoenei thanbü nyaksinam Willow Shushou aeto haoenei künlanglabü.

⁸Aishanga ngekbü ngühlang Moab leilang sühko haua; kho haapyobü ngühlangei Eglaim hoba Beerelim sühkei.

⁹Aishanga Dibon kabü dei shuong siiei shenakei; aishanga Dibon thüka, Moab ka satenbü shuong thükto hoba kaonyeka jouletbü jungto ngei toukei molosaonyu che sungbalabü.