Read Chang Naga ISAIA 16 Bible Online

ISAIA 16 - Chang Naga bible

ISAIA 16

¹Kanei Sela laobou yamlamang aenei ki, kho ka kaonyek songdakbü shuong shanga Zion nouyangshou shongh jungto sanlon shoushou shuong hautiashi.

²Aishanga ho tegü kilabü, hap ka shian sattibü aushuong tegü shoongailabü, Moab nou- yangshou shuong Arnon shukoa kilabü.

³“Songsido kuashi, matjem kuashi, chajihboua kaibü yeme nangnak tegü yeitishi! Nangletbü shuong hutiashi hoba satbümaubü shuong tehuonettima.

⁴Moabbü satbümaubü shuong kan yoa kitiashi, leilutibü thedang ka haoen shanga satenshang yingshi!” (Ladang shieikoebü thon letilaje hoba leilutibü nangtilaje, hoba nakan yantibou kaonyek ka akiko mautilaje.

⁵Onoubüa Choba setshang che kümlabü, hoba kho thüka, Dawideibü neichema ngühmaia müt che setlabü.)

⁶Jihudabüei lauda, “Moab lilisese shangabü künei dida. Haoen khei yetsiyetlang hoba haoen yonglam lilibü ki, lausikei haoen sungen yaangenko laubü kho kongkongbü ki.”

⁷Hibü Moabei haoen shanga lapangko manghaaplabü; müt- pem wekoei Moab shanga mang- haapashi. Kirhareseta semlüh linbüei kümbü wentek akisapbü shanga haoen haaplabü.

⁸Aishanga Heshboneibü semlüh kia, hoba Sibma semlüh long linan apan phangshuongei BUNYUBOU shuong ho semlüh maibüei mühtiakei. Jezer sühkokei haoenei sühkei, haoen yam sühkokei shoongjung atkei. Saoeibü bhek shuong pendou aenei haakyo- haakyo koukei; haoen yungnyu thükto limjung koukei.

⁹Hibü ngo Sibma semlüh shanga, Jezer yoa haapda; O Heshbon, hoba Eleale, ngei no ngeibü nyeksiei nemtikuda; aishanga kaibü sulang buhek thüka hoba kaibü youlatbü thük to la- pang ngühlang ngekkua.

¹⁰Hobaje lang hekkushang khongthu ka maang haibü hoba olinbü maua; semlüh seka chia laubü ayingsi olinyobü akilabü; nitshanga semlühdei aoeikei ayungettilabü, semlüh seka olinyoko lemenyobü ngei thaktilabü.

¹¹Khei yingbü khoei Moab shanga kü soushouei kongkin tegü waangda. Ngeibü maangpon Kirheres shanga waangda.

¹²Hobaje Moabei jembü shongh to jembü lolo manganshembo longasikei hao ai ayinglabü.

¹³Moab shanga shangied BUNYUBOUei laubü ho kia.

¹⁴Lausikei tou BUNYUBOUei joyoko lauda, “Po sem kanglanga nyaksinam ühüpbü po tegütham, Moabeibü soneikangbü haoeibü tan yaangbü yoa himou bautilabü, hoba joubü shuong kho aeibou shisho hoba hau akiko kilabü.”