Read Chang Naga ISAIA 17 Bible Online

ISAIA 17 - Chang Naga bible

ISAIA 17

¹Damaska shanga thusei ngühlang. “Chühashi, Damaska sangnyu che akitilabü, kho leilubü thansheibü che ong yeilabü.

²Hobaje Siria sangnyu shuong tekan aplabü; khübü kho sanshuong lamshaushang la yeilabü, haoen lekeitaiko yeplabü hoba aoeikei haoen ashieilabü.

³Toukei Efraima lapheishon akilabü, hoba Damaska ka Choba sangle hoba Siria jouletbü shuong mautilabü; haoen Israel shousi shuong soneikangbü tegü kilabü dogo Thükenbou BUNYUBOUei lauda.”

⁴BUNYUBOUei lauda, “Kho chaloua ho haüthüklabü, khei Jakob soneikangbü shemtilabü, hoba haoeibü phea haabü pekletham aptikulabü.

⁵Hobaje kho youlatbü mütei loan kibü youshou yoshaijinei tegü hoba youman latbü tegü Refaim yomanga mütei youman yoshaibü tegü kilabü.

⁶Ayingsi ladang oliv bulong ka hek kheilaje phailam shanga khonei bukhu suokbüa penyi ayingsi sem tegü bhek hotena leisingao kibu tegü, dogo BUNYUBOU Israel Mühghaüei lauda.”

⁷Kho chaloua mütshuongei kümbou tou chühlabü, hoba haoeneibü nyekei Israel Saopobou to souhat lenlabü.

⁸Touje haoei ikei kümbü kümsilei lemshang to achühlabü; ayingsi hao ikjishouei kümbü Asherim, ayingsi chanyu phatko kümbü heangsho to souhat kubü akilabü.

⁹Kho chaloua haoeibü sangnyu hau kibü shuong kho Israel shousi shuong thedanga Amorbü hoba Hivbüei apyoan satbü haoeneibü sangnyu shuong phatko, kaneibü sangnyu shuong phai senan ngaitilabü.

¹⁰Aishanga nyi kaibü khümenbü Mühghaü hoba no satenshang Laang shanga maangpona adam; hibü kanei Adonis bamang shuong kümasikei hoba küksithang Mühghaü shanga thanasikei,

¹¹khübü nyi kebüongbü chaloua balepan phoan ngeyangje kaibü lilabü kho yemtisikei; kho khei yingasikei khonku hoba maangto shatlabü yaangbü chaloua youlatbü akiko aplabü.

¹²Aha, müt juongnyueibü langh, yungnyu ngühbü ngühlang tegü loubü hoba dei yaangbü kaangko koubü tegü phangshuong ngüh- yoda.

¹³Dei juong kaangko koubü tegü phangshuong shangkei shangko shoongyoda, lausikei haoei haoen to haklabü, hoba haoen saabü to satlanglabü, shongha yei thedanga thamngu soulangbü tegü shian sattilabü.

¹⁴Chühashi, chasemlamto hatlabü! ngeyang asühjinei khübü kho akitida! Ao- youei sen ka soletbü leda haoeneibü phejan hoba sen ka soshau soyungbü shuong thu ho ki.