Read Chang Naga ISAIA 19 Bible Online

ISAIA 19 - Chang Naga bible

ISAIA 19

¹Ijep shanga thusei ngühlang. Chühashi, BUNYUBOU sobüsepbü sangmeia setan Ijep jungto louada; hao thedanga Ijepbü heangsho shuong topeida, hoba Ijepbü maangpon jembü to tühnyinda.

²BUNYUBOUei lauda, “Ngei Ijepbüei Ijepbü khulimbo pühnyintilabü, hoba haoen müt- pem weko jaisina khulimbo hoba mütpem weko jembü lepbou khulimbo, sangnyuei sangnyu khulimbo, Chobaei Choba sangle khulimbo wapyolabü.

³Hobaje Ijepbü soushou akiko aptilabü, hoba haoeneibü huon ngei mautikulabü; haoenei heangsho shuong, shetsikhau kibü shuong, hoba yemshanla haubü shuong, hoba seibüyaübü shuong lamlabü.

⁴Hobaje onou akibou songdakbou la ngei Ijep kuan aplabü, hoba sekbülakbü Choba cheei haoen thükka songdaklabü.”

⁵Hobaje Nail shumang ulangtham hoba shumang kho lela akiko apbo hapan aplabü.

⁶Hobaje shumang shuong nyaüan aplabü, Ijep Nail shumang shushou shuong shijung ngailabü hoba linoktham aplabü, thakdu si sanglong yuian aplabü.

⁷Nail nyangko khongthua yamsang Nail shumang nyangko hoba Nailei komlepan kibü pendou ulangtham yeilabü hoba touje ai akiko yeitilabü.

⁸Ngaulapbü shuong to khau angyolabü hoba Naila ngauyaüjin attibü shuong haaplabü hoba aoyouei deia tak tekda haoen phaklaktham aplabü.

⁹Toukei aoyouei phembalei neisimei kümbo khaangnei takda, hoba aoyouei mokok takda haoen himousele kilabü.

¹⁰Haoeibü chemshang netla yeiko leilulabü, hoba eikei jekbü pendoua maang koulabü.

¹¹Zoana kabü Chobaeibü shousi shuong ngoubü! Faraoeibü songbüdobü shuong songsihon akiboula yeia. Kanei lai Farao to, “Ngo songei keiboueibü shou, shangiedbü Choba shuongeibü shou,” dogo lauenla?

¹²Khülonga kaibü songbüdobü mütshuong lanei ki? Haoenei tou ka la lentiashi; hoba Thükenbou BUNYUBOUei Ijep khulimbo ai kümla dambo ki, kho haoenei ngetiashi.

¹³Zoan Chobaeibü shousi shuong ngouan apa, hoba Memfibü Choba shousi shuong khüpettia; haoenei Ijep, laobou haoenei phangshuongeibü chemnyek laang ki, ayingbü to leilanga.

¹⁴BUNYUBOUei haoeneibü maangaenei khüpeilangeibü songsido kheinepbua; hoba ihei jaakbü müt ngaitiko ngomeitaiko kibü tegü haoenei Ijep haoeibü kümsilei pendoua ayingbü to hautida.

¹⁵Thükkabou ayingsi phangkabou yingsikei ekyanglong ayingsi thakdulong yingsikei aoeikei Ijep shanga aikei akümenlabü.

¹⁶Hobaje kho chaloua Ijep yaksa phatko kilabü; hoba Thükenbou BUNYUBOUeibü ik topeibü, laobou haoei ho thüka dopeida kho haangjung haoei lühlabü hoba hatlabü.

¹⁷Hobaje Jihuda kaodak Ijep shanga hatlamoklabü che yinglabü hoba Thükenbou BUNYUBOUei Ijep khulimbo ai kümla janenkei, kho shanga müt aoyou ong ho shanga laulaje hatko kilabü.

¹⁸Kho chaloua Ijep kaodaka Kanan ngüh lauyobü shuong hoba Thükenbou BUNYUBOU to theyolanyobü sangnyu ngao kilabü; che to Chanyu Sangnyu dogo nyenlabü.

¹⁹Kho chaloua Ijep kaodaka BUNYUBOU shanga lemshang che hoba leilanga thaonyu che kilabü.

²⁰Hobaje Ijep kaodaka Thükenbou BUNYUBOU shanga tetsida hoba aukabü shanga ho kilabü, aishanga shieikoebü shuong kibü haangjung haoenei BUNYUBOU to ngeklabü, hoba haoei haoen jungto khümenbou che hoba hau yaangbü che hautilabü, hoba haoei haoen khümenlabü.

²¹Hobaje BUNYUBOUei Ijepbü ngean aplabü hoba Ijepbüei kho chaloua BUNYUBOU ngeanlabü; haü, haoenei haitibü lembü hoba juokbü lembü lemlabü, hoba BUNYUBOU to theyolanyoan pholabü, hoba kho kümlabü.

²²Hobaje BUNYUBOUei Ijepbü to ngümsikei maitila shanga ong ngümlabü; hoba ladang haoenei BUNYUBOU jungto sepeilaje haoenei subüjabü shuong to haoei ditkulabü, hoba haoen maitilabü.

²³Kho chaloua Ijep ka Assiria sühko lamkhong che kilabü, hoba kho danko Assiriabü Ijep aeto hoba Ijepbü Assiria aeto haulabü hoba Ijepbüei Assiriabü yoa BUNYUBOU to lemlabü.

²⁴Kho chaloua Israel Ijepbü yoa semboubü yinglabü, hoba kaonyudaka haülabü che yinglabü.

²⁵Aishanga Thükenbou BUNYUBOUei haoen haükuko laukei, “Ijep kü mütli, hoba Assiria küküm külei, hoba Israel ngeibü phetphan.”