Read Chang Naga ISAIA 2 Bible Online

ISAIA 2 - Chang Naga bible

ISAIA 2

¹Jihuda si Jerusalem shanga Amozeibü shou Isaiaei hapbü ngüh.

²Thonbü chaloua ho haüthüklabü, khei BUNYUBOUeibü chem kho shongh shuong khua, shonghshou thüka tonenan phokulabü, hoba phang pendou khüto nuyolabü.

³Hobaje müt juongei hauan laulabü, “Kan kaiya, Jakob Mühghaü chem to, BUNYUBOUeibü shongh to sen angkho, hoba haoei haoeibü lamnyu shuong sen la lenlabü, hoba seneibü lamnyua sen paikho. Aishanga Zion ka haoeibü lenbü shuong hoba Jerusalem ka BUNYUBOU ngüh louda.”

⁴Hobaje haoei phangshuong yoa matjemlabü, hoba müt juong mat jemlabü; hoba haoenei jembü inei shap, hoba aubuei hausao yaülabü; phangei phang khulimbo in ajaplabü ayingsi haoenei touje wapyola aditletlabü.

⁵O Jakob chemdang, kaiya, senei BUNYUBOU ngesakbüa paikho!

⁶Aishanga haoei jembü mütli Jakob chung nangleda, aieilausi haoen chaangbou aekabü seibü- yaübü kümeileiei shena, hoba Filistiabü tegü huonseibüei shenakei, hoba küksithang yenbou to ik shenyoda.

⁷Tokei haoen kaodak chandinam hoba honei shenakei, haoeneibü thanshang thon aki; tokei haoen koliei shenakei, haoeneibü kailong shuong thonsithak aki.

⁸Haoen kaodak heangshoei shenakei, haoen jembü ikküm iklei haoenei lemda.

⁹Hobaje akainyu shuong khüpettiakei, hoba yaangbü müt louyantiakei, khei yingbü khoei haoen la amai tüpbuma!

¹⁰BUNYUBOU hatla moklabü jungka, hoba haoeibü soumo yaang soneikangbü ka laangbob to atshi, hoba thamngua no hushi.

¹¹Kui saabü to chühbü müt phangto louyantilabü, hoba yonglam lilibü müt phangto khüpjung yantilabü, hoba kho chaloua BUNYUBOU ong tonenlabü.

¹²Aishanga lilisesebü hoba yonglambü pendou khulimbo, hoba tonenan kibü pendou khulimbo,

¹³Lebanona cedar bulong suokbü hoba tonenan kibü; hoba Bashan kabü yembu long pendou khulimbo;

¹⁴hoba shongh suokbü pendou khulimbo, hoba shonghshou tonenan kibü pendou khulimbo;

¹⁵hoba laangchem suokbü weko khulimbo, hoba thangetan kibü ba pendou khulimbo;

¹⁶hoba Tarshish longchem pendou khulimbo maangli maangsang ikkümiklei pendou khulimbo.

¹⁷Hobaje suokbü to angan kibü mütshuong senletlabü, hoba yonglam lilibü shuong phangto tonletlabü. Heangsho shuong lemailela dankhümlabü; khünyet chaloua BUNYUBOU mütpem ong tonenlabü.

¹⁹Hobaje ladang BUNYUBOUei kaodak kho nyaakla meimeilaje hatbü yaangbü, soneikangbü ka mütshuongei laangphang hoba kao khünyet to atan hulabü.

²⁰Kho chaloua mütshuongei jembü shanga lemla kümbü jembüeibü chandinam heangsho shuong si honeibü heangsho shuong, haoenei somshou sompung hoba pak shuong thedanga tekan aplabü.

²¹Hobaje ladang haoeibü hauei kaodak nyaakeila meimeilaje, BUNYUBOU to hatbü ka hoba hao to hatbü soneikangbü ka laangchem, hoba laang paknyinbü lambo atlabü.

²²Kungkhün ka hak hinda dogo ong lang kibü müt to maanglem phobü ka nangashi; aishanga hao ai mu ki?