Read Chang Naga ISAIA 22 Bible Online

ISAIA 22 - Chang Naga bible

ISAIA 22

¹Mangsang pholi shangabü thusei ngühlang che. Tou, pendou chemdak to angan apbü ho kan ai yingkei?

²O no ngekbü ngühlang hoba oyolemenbü sangnyu, olinbü sangnyu! Kaneibü haitibü shuong kho inei haitibü aying, ayingsi lasona haibü aying.

³Kaneibü songdakbü pendou kho liko satan apbei; haoen lau jungbü shuongei lapbei, haoen saabü to satasikei hapbü pendou liko lapbei.

⁴Hibü ngei laukei, “Kü to chühashi, ngo aeibou haaplabü, kü mütli nouyangnyu shanga, ngo maang sula hautejem.”

⁵Aieilausi mangsang pholia Thükenbou BUNYUBOU Mühghaü ka ho panglangbü nakan yantilabü, hoba banyu leilulabü hoba shongh to ngekbü chalou ki.

⁶Hobaje Elambüei sepai müt tan hoba kolia setbü shuong yoa laujin subü khek jungkei, hoba Kirbüei aih lamlean phokei.

⁷Kan pienbü pholi shuong kailongei shenko kikei, hoba kolia setbü mütshuong haoen lolo bakhüna linküman kikei.

⁸Hobaje Jihudabüeibü nongetshang kümbü haoei sungan apbukei. Hobaje kheijinei kanei yamkabü chema insiaubu lambo haukei.

⁹Hobaje Dawid sangnyua khün juong yetbü to kanei maang kukei, hoba phangaenei süngküp kibü dei shuong kanei leishaikei.

¹⁰Toukei kanei Jerusalema chem weanchühkei, hoba banyu kümthang kümetla shanga chem shuong kanei pankei.

¹¹Hobaje bamang kümthang penyi kanglanga kanei süngküp hangbou dei shanga dei thanshang kümbei. Lausikei thedangto thama aoei ho huongkei, kanei hao to maang aku.

¹²Thükenbou BUNYUBOU Mühghaüei kho chaloua kan to haapla hoba mang haapla shanga hoba khu kütan apla hoba senounei shembe kaila shanga ngakei.

¹³Lausikei chühashi, olinangko maangnyuangko masu pongsu hoba sanlon haitiko phe shauan ih yungyokei. “Senei shauakho hoba yungakho, aishanga ngietje sen hailabü,” dogo kanei dambei.

¹⁴Lausikei Thükenbou BUNYUBOUei jembü lolo ngeibü nouei ditko tang khitko laukei: Thükenbou BUNYUBOUei lauda, “Maimaitham kan ühai shongko ho shedshonbü amai üpbulabü.”

¹⁵Hibü Thükenbou BUNYUBOUei lauda: Kaiya, hauashi, hoba Choba chema ikjaibou Shebna to laushi,

¹⁶“No hanei ai kümda, hoba hanei no ao dogo damda, khei ka shanga hanei hee thüngenko, kaibü hee thükaenei suokko thüngenan ka shanga laang thüka chem dangbü ho ai?

¹⁷Chühashi, O no hauki yaangkibü müt, BUNYUBOUei no kaangkhühtham hatleplabü hoba wenan koutilabü.

¹⁸Hobaje leitem che phatko, tongko tongko kaonyek saabü to souan koutilabü, hoba kaibü soneikangbü kailong shuong khüto haulabü, kaibü BUNYUBOUeibü chem shanga no himou bautilabü!

¹⁹Ngei no kaibü kümsilei ka apbulabü hoba no kishang ka no kuktilabü!”

²⁰Hobaje kho chaloua ngei ngo khangenbou Hilkiaeibü shou Eliakim ngalabü;

²¹hoba ngei ngeibü hele hao la lekulabü, hoba haoei hao la shembe kaikulabü; hoba kaibü songdak hau hao la kuan aplabü hoba Jerusalema kibü shuong hoba Jihuda chungeibü bou hao yeilabü.

²²Hobaje Dawid chung sabi ngei haoeibü phaka peitian phokulabü; hoba haoei iplabü hoba ao müteikei akaplabü; hoba haoei khinlabü hoba aoeikei aiplabü.

²³Hobaje kaangbü kaoena ngei hao kojal tegü thüngan phokulabü, hoba boueibü chem shanga hao hangenbü Choba setshang yeilabü.

²⁴“Hibü hao la boueibü chem soneikangbü pendou, shousimi hoba longbü, thungshou phaushou weko, thungsiphau ka yeiyolabü thung pendou haoenei hao la ankulabü.

²⁵Kho chaloua, Thükenbou BUNYUBOUei lauda, kaangkhühtham kibü kaoena thüngbü kojal pakngoklabü hoba kho wa- pan koutilabü hoba atlabü, hoba kho thüka kibü on wapan aplabü,” aishanga BUNYUBOUei kho laua.