Read Chang Naga ISAIA 24 Bible Online

ISAIA 24 - Chang Naga bible

ISAIA 24

¹Chühashi, BUNYUBOUei kaodak kongkong yeitilabü, hoba kho nangletlabü, kho khü- peikulabü, khonei kibü müt pendou phinnyintilabü.

²Hobaje kho mütshuong to lai, kho tegü ungshedbou to kei kho tegü jetei; hoba sambü to lai, kho tegü bunyubou to kei; sambüsao tou lai, sambünyu to kei kho tegü; jekbou to lai, kho tegü yaakbou to kei; lotbou to lai, kho tegü lotkubou tokei; sungletbou tou lai, kho tegü kubou to kei kho khei kilabü.

³Kaodak lemailela kongan aplabü, hoba lemailela huan aplabü; aishanga BUNYUBOUei ho ngüh laua.

⁴Kaodakei mang- haapda hoba yuida; kaodak shepjung atda hoba nyaüan apda. Kaodakbü yaangenbü mütshuong heletda.

⁵Kaodaka kibü shuongei kaodak shatida; aieilausi haoenei ngühkhüm shuong leilulabü, sangle ngühkhüm deikhüm inletkei, hoba ponpen shanga theletlanletbü ngühkhüm leilukei.

⁶Hibü shedsikhauei kaodak suida; aoyou khünei kida haoen to shedbü hapda; khunak shousi shuong haikhümda, hoba müt shisho ong jouan kia.

⁷Ih haanbüei mang haapda, semlüh long linoktham apda; jih chenei olinangko kibü mütshuong tou ngangda.

⁸Lemchi kungei nyilang phatphatbü thonda, aoyou olinyoda haoeneibü ngüh thonda, kaangbü kongkinei olinbü thonda.

⁹Haoenei chia lauko ih ayunglabü; aoyouei nyakidei yungda haoen la kho khaukulabü.

¹⁰Panglangbü sangnyu tuongakei; aokei üetenlabü lele chem kho khinakei.

¹¹Ih shanga khonga ngekbü ngühlang kia, themai maangmai pendou menthubang apakei; kaonyek ka olinmaangmai sada.

¹²Sangnyua lusakbü apyoakei, hoba khoeibü bakhün netla yeiakei.

¹³Aishanga oliv bulong ka ngümletjinei ayingsi semlüh kheibü chaloua shem nitnyinbü tegü, phangshuong yoa kho tegü kaodaka kilabü.

¹⁴Haoen joubü satenbü shuongei olinbüei ngüh longlabü, BUNYUBOU soumo yaangbü shanga haoenei ngüh yaangbüei yungnyu ka ngekda.

¹⁵Hibü, Israel Mühghaü, khei BUNYUBOU nyen yungko kabü kaodak chaangbou kanei BUNYUBOU soneikangtiashi.

¹⁶Kaodak thonbü ka künei nyensang chia “Saopobü to soneikangbü” dogo lauko ditda. Lausikei ngei laukei, “Ngo ügütü! Ngo ügütü! Ngo linetda! Khüpbülangbü shuongei khüpbolangko jungeida, haoeneibü khüpsilang ai ai amaibou yeida!”

¹⁷Hatlamoklabü sung ka thüka kia, O kaodaka kibü müt shuong.

¹⁸Hobaje ao hatlamoklabü ngühlang ka satlaje püngkhün to atlabü; ao püngkhün ka satenlaje sunga minlabü; aishanga müha koulom shuong ipakei, hoba kaodak chemshang nyaakeida.

¹⁹Kaodak maisho leilua, kaodak lemailela tühnyina. Kaodak maiko tennyina.

²⁰Ihei jaakbü müt tegü tuong nyinyi kilabü hoba chemshou tegü yeinakei soueilabü; hoba haoeibü ngühkhüm leilubü ho thüka yaang kilabü, hoba kho tuongbü kho nyibou apingailabü.

²¹Kho chaloua ho haüthüklabü, khei BUNYUBOUei thükaenei saabüa kibü Thükenbou hoba kaodaka kaodak Choba shuong shieikoelabü.

²²Hobaje langsenbü shuong thüngdanga leishaian phobü tegü haoen liko leisheilabü, hoba thüngdanga thüngan pholabü, hoba chalou lounyu kian peanchühlabü.

²³Kheijinei litnyu mangtüngtham aplabü hoba chanyu himoulabü, aishanga Ziona hoba Jerusalema hoba haoeibü jaishou shuong thedanga soneikangko Thükenbou BUNYUBOUei songdaklabü.