Read Chang Naga ISAIA 25 Bible Online

ISAIA 25 - Chang Naga bible

ISAIA 25

¹O BUNYUBOU, no ngeibü Mühghaü ki; ngei no yaangentilabü, ngei ka nyen sanglabü, nyi seikümseilei küma; shangieda kümthen kümbü maanglembü maimaithama haüthüka.

²Aishanga nyi sangnyu shemtiko shaang che la yeitikei, hoba lapheishon küman kibü sangnyu leilubü che la yeitikei; küksithang shuongeibü laangchem touje akilabü, kho nyibou ladangkei akümenenlabü.

³Hibü hau kibü phangshuong mütliei no soneikangtilabü, hatlamoklabü phangshuong sangnyu shuongei ka to hatlabü.

⁴Aishanga kaangbüsekbü mütshuong khauangbü bamang kümthang khulimbo lotbü yeinak tegü kijinei no shalebü shanga hau kibü lapheishon, yeinak ka satenshang hoba lemabü ka yemekoubü che kilabü.

⁵Ulangtham kibüa lemabü tegü kilabü. Nyi küksithang shuong ngüh üangko aptikei; sangmei yemekoubüa lemabü tegü, onou akakbü mütshuongei chia laubü nyi thaktilabü.

⁶Ho shanga Thükenbou BUNYUBOUei müt pendou shanga haabüteibü, teibüjemoubü kongei ong lem shaula lamlelabü; ih phet thüka saüenbü lomaanghaiei shenan, phet thüka maisho semletbü iheibü lem lilabü.

⁷Hobaje ho shongha haoei müt pendou thüka danga yukbü hoba phang pendou thüka yuklepbou kho mautilabü;

⁸haoei ponpen shanga haibü kho suilabü. Thükenbou BUNYUBOU Mühghaüei thenyek pendou ka nyeksi haman apbulabü; hoba haoei mütli to hakbü haoei kaothe pendou ka sungan aplabü; aishanga BUNYUBOUei laua!

⁹Hobaje kho chaloua ho hai laulabü, “Chühashi, ho seneibü Mühghaü ki, senei hao chüheikei, hoba haoei sen khümenkei. Ho BUNYUBOU ki, senei hao chüheikei; senei hao khümenbüa lemseko olinyoakho.”

¹⁰Aishanga ho shongha BUNYUBOU ik tenan pholabü, hoba Moab hao kishanga od apshang püngkhüna youho nakeibü hima nakeilabü.

¹¹Hobaje dei itbüei dei itla ik shingbü tegü haoei khübü thüka ik shinglabü; lausikei haoeibü maangli maangsang ik yoa Mühghaüei hao tonletlabü.

¹²Haoeneibü laphei kümthang suokbü haoei senletkulabü; haoei senan yantikulabü, khei kaoa, thamngua sühko senyankulabü.