Read Chang Naga ISAIA 26 Bible Online

ISAIA 26 - Chang Naga bible

ISAIA 26

¹Kho chaloua Jihuda kaodaka ho chia laulabü: “Künei hau kibü sangnyu che kia; khümenlabü shanga haoei kümthang hoba thangetlabü kümlabü.

²Ngühmai jungeibü saopobü phang atla shanga kanei bakhün ipashi.

³Ka to ikphen laman kibü maangpon nyi hakso benbüsoubüa phoda; aieilausi nyi hao to mailemda.

⁴Kanei ponpen shanga BUNYUBOU to mailemashi; aieilausi BUNYUBOU Mühghaü kho thonsithak akibü Laang ki.

⁵Aishanga haoei thükaenei, sangnyu suokbüa kibü shuong senyankei, haoei kho phangto yantikei; haoei kho kao hima, khei thamngua sühko sungyankei;

⁶Youei kho nakan yantilabü; khei shalebü youei, hoba thuibü akibüeibü younak yeitilabü.

⁷Saopobü lamnyu tangsheitham kia; saopobüeibü lamnyu nyi lenglengtikuda.

⁸Kaibü matjembü lamnyua, O BUNYUBOU, künei no chüheikei; kaibü nyen damenlabü kho küneibü soushou maangdak ki.

⁹Kü soushouei ngei no nangnak maangdakko kikei, haü, ngeibü maanga soushouei ngei no aeibou lamda. Aieilausi ladang kaibü matjembü kaodaka kilaje, kaodaka kibü mütshuongei saopobü ditletda.

¹⁰Amaibü to onou lenasikei haoei saopobü aditletda; maangtangbü kaoa haoei amaiko jungeida, hoba BUNYUBOU yaangenbü to aweeida.

¹¹O BUNYUBOU, kaibü ik tonenakei, khei yingasikei haoenei ühüpda. Haoen la ka mütshuong shangabü kaibü maangdak haptiashi, hoba haoen himou bautiashi. Kaibü dangbou shuong shanga phobü wanei haoen suitiashi.

¹²BUNYUBOU, kün la hakso kümbüma; aishanga nyi kün shanga kümsilei pendou kümbua.

¹³O BUNYUBOU, küneibü Mühghaü, ka to liman lubü bunyu shuongei kün thüka songdaka, lausikei künei ka nyen ong hangenda.

¹⁴Haoen haikhüma, haoen lang akida; haoen yeme che ong yingkei, haoen apingailabü. Nyi haoen kayangei pean chühkei hoba haoen leilutikei; nyi haoen damenbü khümbo mautikei.

¹⁵Nyi phang haatia, O BUNYUBOU; nyi phang haatiyaangtikei. No soneikangko kia; nyi kaodak leikhuleidang pendou yaangngaitia.

¹⁶BUNYUBOU, khonsaka haoenei no lambei; kaibü hakbü haoen to kijinei haoenei subüjabü hautikei.

¹⁷Mang akongbü sao na hapla jih nyangko loujinei, sao khonkuei ngekbü phatko O BUNYUBOU, kho tegütham kün ki.

¹⁸Kün mang akongko kikei, kün na hapla khonkuko kikei, lausikei künei yei ong bukletkei. Künei kaonyu la khümenbü asungba; künei kaodakbü müt la abukku.

¹⁹Lausikei kaibü haibü lang kilabü; haoeneibü mang langngailabü. O thamngua lang kibü shuong, pienashi hoba olinbü ngekyoashi! Aishanga kaibü nindei kho ngeyangbü nindei; hoba aoyou haian ki BUNYUBOUei langngeitilabü.

²⁰Hauashi, kü mütli, no kaibü shemjang to atashi, hoba ka phainei kou khingngailangashi; haoeibü maangshat adan shongko no lolo khonei huashi.

²¹Chühashi, BUNYUBOU kho hao kishang ka kaodakbü mütshuong haoeneibü shabü shanga shieikoela louada. Kaonyuei sao thüka sii phinbü khuokenkulabü; saoei saoeibü haibü lalok küplepan apholabü.