Read Chang Naga ISAIA 27 Bible Online

ISAIA 27 - Chang Naga bible

ISAIA 27

¹Kho chaloua BUNYUBOUei inlou yaangbü hoba hau kibüei piyang sobüsepbü Molojisang kho khei, kombükaibü pinyu Molojisang kho shieikoelabü; hoba yungnyua kibü dragon haoei haitilabü.

²Khünyet hai laulabü; “Maangamailabü semlüh bamang, kanei ho shanga chia lauashi!

³Ngo BUNYUBOUei ho lomda; chalou jihsiphai wekoa ngei hato dei lakda; atei ho leilukubüla dogo ngei kho ngeyang nangnak pendou lomda.

⁴Ngo maangpoklabü ai aki. Ngo khulimbo sang hoba jaklongei lason huiletkei yingma! ngo haoen khulimbo meimeilabü. Ngei haoen liko jikan aplabü.

⁵Kho khei aying longa haoen lolo kü phang to lotan satetlangashi; haoenei kü to sangmai kümtiashi, haü, kü to sangmai kümtiashi.”

⁶Kho chaloua Jakob li atlabü, Israel tonglabü hoba tongbü kho bunglabü, hoba haoeneibü maiei kaodak pendou shenlabü.

⁷Sao to ngümbü shuong to BUNYUBOUei ngümbü tegü sao to ngümakei si? Sao haitibü shuong haitibü tegü sao haitiakei si?

⁸Haoei haoen takan chühko kaodak ka shian sattiko meimeikei; chaangbou yei soubü chaloua haoei haoen kaangbü yeiei souan sattikei.

⁹Hibü khoei Jakobei shonbü shedbü kho soulanglabü, hoba haoeibü shabü apbü hek pendou ho kilabü; khei haoeneibü lemshang laang pendou laangthu tegü netla yeiko ngümnyinkulabü, khei Asherim ayingsi jenjuokbü lembü touje akümtilabü.

¹⁰Aishanga thangetan phobü sangnyu shakkeishakko yam phatko apyoan hoba inletan kia, khünei masu shoushou lamshaulabü hoba khünei hao leketnyu yeplabü, hoba khünei kibü bubhek shuong jepshaulabü.

¹¹Ladang khoeibü bubhek shuong linlaji, yaksa shuong loulabü, hoba wan sapan phokulabü. Aishanga ho ditenbü akibü mütli ki; hibü aoei haoen kümbei haoei haoen shanga sanouko adamlabü hoba aoei haoen yeitikei haoei haoen to maang ashiklabü.

¹²Kho chaloua Eufrates shumang ka Ijep shumang sühko BUNYUBOUei youman ka youshou nakletlabü; hoba O Israel shousi shuong, kan che chea heshailabü.

¹³Kho chaloua teklaang yaangbü metlabü; hoba aoyou Assiria kaodaka mauan ki, hoba aoyou lühbaka ayobü phang Ijep kaodaka ki, loulabü hoba Jerusalem saopobü shongha haoenei BUNYUBOU lemlabü.